Aktres ayaw nang maging dekorasyon sa baguhang aktres; Sikat na love team damay din

Inis na inis ang maganda at magaling na aktres sa sarili dahil pumayag na naman siyang maging back­ground ng baguhang actress. Nangyari ito sa TV launch ng bagong show ng newcomer at habang naglilitanya ito nang pasasalamatan, nakatayo lang sa kanyang likod ang magaling na aktres kasama ang cast ng soap.

Pangalawang beses na itong nangyari sa maga­ling na aktres, una na siyang naging dekorasyon ng isang sikat na loveteam sa show ng mga ito sa Araneta Coliseum. Nasa likod lang siya at ang ibang kasama sa show habang naglilitanya ang magka-loveteam nang kanilang pinasasalamatan.

Ayaw na ng magaling na aktres na maulit ang nangyari kaya magiging careful na raw siya sa pagtang­gap ng mga susunod niyang guesting.

* * *

Naniniwala na kaming wala ng komunikasyon sina JC de Vera at Yasmien Kurdi dahil magkaiba ang kanilang pahayag tungkol sa kanilang friendship. Sabi ng aktres sa interview sa kanya ni Lhar Santiago sa storycon ng Saan Darating ang Umaga, wala silang away ng former loveteam at hindi niya alam kung sino ang gumagawa ng isyung war sila.

Sabi naman ni JC sa presscon ng Lalola, hindi siya pinapansin ni Yasmien, pero hindi naniniwalang nagseselos ito sa loveteam nila ni Rhian Ramos. Baka nga busy lang ito sa school, kaya three times nang tumangging makapareha siya.

Ni-request kasi ni JC na makatambal si Yasmien sa isang episode ng Obra, pero hindi nito tinanggap at ang pinakahuli’y sa isang episode ng Maynila. Umaasa pa rin ang aktor na magkakasama pa sila sa trabaho ng aktres dahil marami silang fans.

On the other hand, natutuwa si JC na tinanggap ang loveteam nila ni Rhian sa La Lola nang hindi kailangang magkarelasyon sila ng totoo. Wish ng aktor, magtuluy-tuloy ang magandang ratings nito para matuwa ang GMA 7.

* * *

Hindi lang ang inauguration ng GMA Center Annex ang hinabol ni Dingdong Dantes sa pagmamadali niyang umuwi ng bansa mula sa Amerika. Ginusto rin nitong narito siya sa ending ng Dyesebel nila ni Marian Rivera at hindi madi-disappoint ang sumubay­bay sa fantasy series for six months dahil isang nakakakilig na finale ang mapapanood.

Maghanda lang si Dingdong dahil kukuyugin siya ng press para hingan ng comment sa pahayag ni Karylle na hindi pa sila break na nasulat na kanyang ikinairita’t usapan daw nila na sabay silang haharap sa press. Tila sabay nilang aaminin ang tunay na estado ng kanilang relasyon, pero inunahan siya ni Karylle.

Kahit tapos na ang Dyesebel, ang One True Love nina Dingdong at Marian plus Iza Calzado ang aabangan ng mga fans at ang next series nilang Ang Babaeng Hinugot sa Aking Tadyang.

* * *

Hindi na lang TV star si Patani Daño, ang pinaka­sikat na castaway ng Survivor Philippines, dahil artista na rin siya! May cameo role siya sa Sundo ng GMA Films bilang maingay na katulong nina Iza Calzado at ang basketball player na si Simon Atkins na gaganap namang mag-boyfriend.

This Friday na ang shooting ni Patani at kaeksena niya sina Simon at Iza. Ang suwerte ng hitad at first movie ay si Topel Lee ang director at bigatin ang mga kasama sa eksena. Sayang lang at hindi nito maka­ka-eksena si Robin Padilla na gusto niyang makapareha.

Kailangan lang maipalabas agad ng GMA Films ang pelikula habang sikat pa si Patani at natutuwa pa sa kanya ang tao. Baka abutin pa ito na sawa na ang tao sa kanya.