Mr. Cebu 2008 candidates: Makahuluganong Rampa

Ambungan ug Utokan! Mao kini ang mga hiyas sa 16 ka mga ulitawo nga magtigi sa Mr. Cebu 2008 nga unang naaninaw sa publiko pinaagi sa Clothes For Life “One For Tomorrow” fashion show diha sa Teatro Casino sa Cebu Waterfront Hotel sa Lahug, niining bag-o lang. Kinsa mogawas nga mananaug nilang tanan ug kinsay gihugon-hugon nga molangkat sa titulo isip labing unang Mr. Cebu?

Usa sa mga giatangan mao si Mc Billy Wilford Sy, nga usa ka 4th year IT student sa AMA Computer College ug mo-graduate sunod buwan isip Summa Cum Laude. Usa pod siya ka Freelance Web Developer. Laing giisip nga lig-on nga kandidato mao ang licensed nurse nga si Joseph Hornido sa Southwestern University nga nagkuha karun og Masters of Arts in Nursing, nga niining bag-o lang napili nga Mr. Siglakas 2008, sa maong unibersidad.

Apan, dili kakompyansahan ang uban pang mga kandidato sama nila ni John Michael Contreras (CIT-nursing), David Tingalin (call center agent), Dandie Dimataga (USC-Tourism Management), Donald Bahi-an (Cordova), Rham Ric Simpron (USC- Electronics and Communications Engineering ug usa ka call center agent), Basanio Causin (UC-Banilad-Tourism ug usa ka print-ad model), Jones Carlos Poe (licensed nurse gikan sa SWU), Charlie Manguilimotan-Labating (University of the Visayas-Criminology), Ram Jordan Lorzano (CIT-Marketing Management), Kurt Agbay (UC-Banilad-Informations Management), Jazz Lozaga, Jerone Mirafuentes (UC-Main-IT), Hans Joakim Grogaard (USC-BA Entrepreneurship) ug si Marvin Campaner (SWU-Optometry). Kini tungod kay matod pa sa mga nakasaksi sa maong fashion show ug nakadungog sa tanang mga kandidato diha sa ilang pagtabi ibabaw sa entablado, maayo gyud pagkahashas sa BCB Productions ni Bong Bantilang ang mga magtigi karong tuiga.

Kahinumduman nga ang 16 ka mga adonis mi-rampa sul-ob ang mga mugna sa mga designers nga miyembro sa Clothes For Life, nga usa ka dekada nang organisasyon sa mga designers sa Cebu.

Si Harley Ruedas maoy kasamtangan nga pangulo sa Clothes For Life ug gisuportahan siya sa iyang mga co-officers nga sila si Cary Santiago (Vice President), Edwin Alba (Secretary), Rey Humberto Villegas (Treasurer) ug si Mark Anthony So (Auditor).

“Nanghinaut ko nga sa akong termino, mamahimo na gyung foundation ang Clothes For Life, nagkinahanglan pa mi og usa ka milyon para mamahimong foundation, maong daghan kaayo ming fund raising activities nga gihimo ug pagahimuon to serve our purpose and that is to share what we have to our less fortunate brothers and sisters” pong pa ni Harley ngadto sa Banat Hugyaw.

“Clothes For Life also would want to produce and encourage more talents, more designers and stylists in Cebu. We are here to expose them to the industry and somehow be listed among the top designers, not only in Cebu but as well as national and international” panapos ni Ruedas.

Atangi ang labing unang Mr. Cebu pageant karong umaabot October 11, diha sa Cebu City Waterfront Hotel , Grand Ballroom.