Marian mihilak human pakauwawi ni Ara

Mihilak matud pa si Marian Rivera tungod sa kauwaw human siya iwakli ni Ara Mina sa SOP niadtong Domingo.

Ang tinubdan sa PangMasa miingon nga nauwaw si Marian busa mihilak kini pag-abot sa iyang dressing room.

Ang nahitabo mao nga nagdali matud pa si Ara nga makaduol ni Mother Lily Monteverde kinsa gihatagan og tribute sa SOP. Buot ni Ara matud pa nga maka-greet ni Mother Lily ug sa iyang pagdali-dali nawakli niini si Marian.

Gikatahong wala pa mangayo og pasaylo si Ara kang Marian.

Kulam “A” ang rating

Nagmaya ang tibouk cast sa “Mag-ingat Ka Sa Kulam” labi na ang mga producers niini nga sila si Mother Lily ug Roselle Monteverde gumikan kay gitagaan kini og grado nga “A” sa Cinema Evaluation Board.

Ikalima na kini nga pelikula ni Judy Ann Santos nga natagaan og grado nga “A”, diin ang gisundan niini ang “Ploning”.

Gawas sa hugyaw nila nga grado, malampuson usab ang premiere night sa maong pelikula niadtong Martes sa gabii  sa SM Megamall. Napuno gyud ang sinehan tungod sa kadaghang mga fans ni Judy Ann.

Sexy ang outfit nga gisul-ob ni Juday niadtong gabhiona diin usa kini ka black dress nga makita ang iyang likod. Uban usab ni Juday sa premiere night ang boyfriend sa aktres nga si Ryan Agoncillo.

Ang “Mag-ingat Ka Sa Kulam” ubos kini sa direksyon ni Jun Lana nga makita na karon sa mga sinehan.