Pasalamat ni Sheryn
Hello mga ka-bonding, kahugyawnatics ug uban pang suki sa Banat Hugyaw, nagmalampuson ug bonggang-bongga ang nahitabong konsyerto sa atong pinalanggang Crystal Voice of Asia, Sheryn Regis atong Huwebes sa Cebu Coliseum. Nagpunsisok ang mga Sheryn Fanatics ug ang mga estudyante sa Cebu Normal University para sa launching sa “Gasa Sa Banay CNU”.
Kini ang proyekto alang gyud sa mga estudyanteng gustong mo-loan para sa tuition fee o di ba kaha alang sa ubang mga gastuhan sa tunghaan. Susama kini sa Study Now, Pay Later nga advocacy. Ug syempre si Sheryn kauban ang ubang CNU ALUMNI TALENTS ang nahimong instrumento para sa labing unang fund raising para sa CNU Supreme Student Government. Kini gisuportaan pud sa presidente sa CNU, Dr. Ester Velasquez nga nahimong ikaduhang inahan ni Sheryn sa college.
“Wala gyud ko magduha-duha sa pagdawat ani nga project kay kahibalo ko nga daghan kaayo ko’g matabangan nga mga co-normalians. Nindot kaayo akong feeling nga in my 5th year sa showbiz, akong ma-share ang akong blessings sa mga tawo nga nanginahanglan,” “nagkanayon si Sheryn. “Kay kung wala ko sa showbiz, nagmaestra man ta ko, so importante kaayo para nako ang education. Bisag pila ka kanta oy, mukanta ko para akong Alma Mater,” padayag pa niya.
Sulit kaayo ang gibayad sa mga tawo nga mitan-aw sa maong konsyerto kay 17 ka kanta ang giawit ni Sheryn. “Allow me to share to you the song that started it all and the songs that made me who I am today,” lenggua ni Inday Sheryn sa dihang giawit niya ang mga kanta nga iyang gipasikat.
Nanlimbawt akong balhibo mga ka-bonding sa dihang midungan og kanta ang tibuok Cebu Coliseum sa iyahang mga kanta. Bigay na bigay ug pwerteng kiay pud ni Sheryn sa iyang gihimong “Beyonce Medley”. “Nakasayaw gyud kos taman. CNU, you made me dance! Lingaw ko da,” hugyaw pa Sheryn samtang diha sa entablado. Daghan pud mi bilib sa finale song with co- alumna Zenith Rivera sa ilang duet nga “The Prayer”.
O di ba, lami gyud ang feeling mga ka-bonding kung kahibalo ka mulingi kung asa ka gikan? Sama ni Sheryn, bisan sa iyahang ka busy, migahin gyud siya og oras para lang makatampo sa usa ka mabulokon nga proyekto. O sha sha, husto na chuva, atong makit-an si Sheryn matag gabii sa primetime bida nga “I Love Betty La Fea” kauban sila si John Lloyd Cruz ug Bea Alonzo ug sa ASAP ‘08 matag Domingo.
- Latest
