Aktres walang pambayad kahit ng kuryente ngayon

Nakakagulat ang kuwentong nakarating sa amin tungkol sa isang aktres na kung ang dating buhay niya ang ating pagbabasehan ay parang imposibleng mangyari sa kanya ngayon ang kuwentong marami na ang nakakaalam.

Parang bukas na gripo na walang tigil sa pag-agos ang biyaya sa kanyang buhay at career noon, ang reklamo pa nga niya dati, nung bata pa raw siya ay malaki ang kanyang wallet pero wala naman siyang mailaman.

Nung dumating naman ang matinding suwerte sa kanyang buhay, maliit na ang branded niyang wallet, hindi niya naman alam kung paano niya pagkakasyahin dun ang kanyang salapi sa dami.

Pero walang kasiguruhan ang buhay ng mga artista, pana-panahon lang ang suwerte sa kanila, habang kumikita ay kailangang malayo na ang tanaw nila sa buhay.

Hanggang makapag-iipon sila ay kailangan na nilang gawin yun dahil mabilis ang transisyon sa kanilang larangan, araw-araw ay maraming bagong mukha ang nagdaratingan, mahigpit ang labanan.

Sabi ng aming source, “Alam mo ba na kahit pambayad niya na lang ng kuryente ngayon, hinahanap pa niya? Nagpapa-rediscount siya ng tseke, palit siya nang palit sa mga kaibigan at kakilala niya, hirap siya sa buhay ngayon.

“Yung mga ipinagmamalaki niyang properties noon, tunaw nang lahat, naibenta na niyang isa-isa nung mga panahong wala na siyang kayod, umiikot ang puwet niya ngayon kapag panahon na ng bayaran.

“Kundi sana siya naging pasaway, binigyan na kasi siya ng panibagong chance noon ng isang network, pero hindi pa niya yun iningatan, nagmarunong na naman siya.

“Ayun, tinigbak ang role niya sa serye, hindi na siya uli kinuha, sino naman kasi ang kukuha pa uli sa ugali niyang ganun? Mayabang na siya, feeling alam niya pa ang lahat-lahat, kaya kinasawaan siya,” simulang kuwento ng aming source.

Dati’y mataas ang tono ng aktres na ito, parang pag-aari na niya ang mundo kung makapanlait siya ng kanyang kapwa, kinaaaliwan ng marami ang kanyang mga pagtataray pero kinaiinisan din yun ng mas nakararami.

“Ngayon, bali na ang pakpak niya. Paano pa siya makapanlalait ngayon, wala na siyang boses, dahil alam niya na bagsak na ang kabuhayan niya?

“Gustuhin man niyang manlait ngayon, mas uunahin na siguro niya ang paghahanap ng paraan para sila mabuhay na mag-iina. Meron pa rin naman siyang natitirang ari-arian, pero kung ibebenta pa niya yun, saan na sila titira ng mga anak niya?

“Inuna niya kasi ang pagyayabang, ang panghahamak sa kapwa niya, ayun tuloy, na-karma siya! Sino ba ang mag-aakala na kahit pambayad na lang sa kuryente ngayon, e, hinahanap pa niya?

“Dati, sensilyo lang para sa kanya yun, hindi niya pinapansin, pero ngayon, bawat sentimo talagang nahahawakan niya, kailangan na niyang ingatan,” kuwento pa rin ng aming source.

Totoo, life is not a bed of roses talaga.

* * *

Tinawagan kami ni Mommy Rose Flaminiano kahapon nang umaga. Ikinuwento niya sa amin ang isinulat ni Manay Lolit Solis sa kanyang kolum, sinabi kasi ng aming kapwa kolumnista na hindi na nito alam kung sino sa kanila ni Gabby Concepcion ang nagsasabi ng totoo.

Sabi ni Mommy Rose, “Ano naman ang alam ko sa kasuhan nila, paano ko naman malalaman yung tungkol sa P700,000 na yun kung hindi si Gabby mismo ang nagsabi sa akin?

“Lagi niyang sinasabi sa akin, singilin na raw namin si Manay Lolit, pero ang lagi kong sinasabi sa kanya, huwag na, dahil napaka-blessed niya naman.

“Nagtataka lang ako kay Gabby, iba ang mga sinasabi niya sa mga ginagawa niya, kung sino ang kaharap niya, dun siya. Bakit hindi niya maamin ang totoong mga sinasabi niya? Panindigan dapat niya yun!” pagdidiin ni Mommy Rose Flaminiano.

Bagooooo????