'Nag-thank you si Gabby sa akin dahil sa aking statement na hindi siya mukhang datung'

Hindi ko naharbatan ng cellphone si Secretary Bayani Fernando nang magkita kami kahapon sa kanyang presscon.

Alam n’yo ba kung ano ang sey ni Papa BF? 

Gagamitin na lang niya sa pagboto sa sarili ang pambili ng cellphone para mag-win siya sa Celebrity Duets 2.

Nagbibiro si Papa BF nang sabihin nito na ang kanyang sarili ang charity niya at kung sakaling siya ang manalo sa Celebrity Duets, gagamitin niya ang datung sa kanyang kandidatura sa 2010.

Tuloy na tuloy na talaga ang pagkandidato ni Papa BF sa 2010 at mukhang pinupuntirya rin niya na siya ang maging next president ng Pilipinas.

* * *

Kasama ni Papa BF sa presscon ang kanyang misis, si Marikina City Mayor Maridez Fernando na always present sa Celebrity Duets.

Ang raffle draw ang highlight ng presscon. Nag-win ako ng P1,000 at mga iPod shuffle at television set ang napanalunan ng ibang mga reporters.

Nagbigay din ng mga Bayani sticker si Papa BF. Puwede ko raw idikit sa sasakyan ang sticker para hindi ako hulihin ng MMDA dahil knows nila na friend ni Papa BF ang may-ari ng sasakyan na may mga Bayani sticker. Bongga ’di ba?

Umapela si Papa BF sa mga reporters na gandahan ang mga reviews sa kanyang performance sa Celebrity Duets. Ganyan siya kadesidido na manalo.

Hindi na kailangan ni Papa BF na umapela dahil maayos talaga ang performance niya sa Celebrity Duets. Malaking bagay ang pagkakaroon niya ng magandang boses.

* * *

Dumaan ako kahapon sa taping ni Ricky Lo para sa The Ricky Lo Exclusives. Halos magkatabi lang ang venue ng presscon ni Papa BF at ang venue ng taping ni Papa Ricky.

Si Gabby Concepcion ang na-sight ko sa taping ng show ni Papa Ricky. Nag-thank you si Gabby sa akin dahil sa aking statement na hindi siya mukhang datung. True naman ang sinabi ko dahil never kaming nagkaroon ng problema ni Gabby sa pera. Ang MMFF scam noong 1994 ang dahilan ng aming paghihiwalay, hindi pera.

Sina Nadia Montenegro at Mark Gil ang kasama ni Gabby sa taping ng show ni Papa Ricky. Laugh nang laugh si Mark nang ipaalala ko ang mga kagagahan namin sa Amsterdam nang mag-shooting dito ang Miss X. Ang Miss X ang pelikula na pinagbidahan noon ni Vilma Santos at si Mark ang kanyang leading man.

Isa si Mark sa mga mababait na artista na nakilala ko. Malalaman mo ang tunay na ugali ng isang tao kapag nakasama mo sila nang matagal sa ibang bansa.

* * *

Bukas na ang showing ng ITALY ng GMA Films. Dinagsa ng mga fans ang premiere night ng pelikula sa SM Megamall noong Linggo.

Hindi dumating si Gabby sa premiere night pero umapir si Bobby Lopez, ang current inspiration ni Rufa Mae Quinto.

Girl na girl si Rufa Mae nang rumampa sa red carpet premiere dahil sa presence ng kanyang foreigner na dyowa. Lumipad pa si Bobby mula sa Hong Kong para maging escort ni Rufa Mae sa red carpet premiere ng ITALY.