Mga Bisaya sa Survivor Philippines

Leona Rica “Nikki” Dacullo, Call Center Cutie

Si Nikki Dacullo empleyado sa usa ka call center dinhi sa dakbayan sa Sugbu. Natawo ug nagdako siya sa Tacloban, ang cute nga pahiyom ug gwapa ni Nikki, nakapahimo niyang rayna sa ilang lungsod. Sayaw ang iyang kalingawan ug ganahan siya nga perming presentable ang iyang buhok.

Vevherly Gador, Farmer girl

Natawo sa Barili, Cebu, nagdako sa umahan si Vevherly. Sa sinugdanan, masaypan nga hilomon ang 20-anyos nga dalaga, apan kun magkasulti na mo, andam siya nga mopaambit sa iyang hunahuna diha nimo. Pero matud pa nga luyo sa iyang maanyag nga dagway nagpahipi ang masakit nga kagahapon. Sanglit duna namay lain-laing pamilya ang iyang mga ginikanan, gitago matud pa si Vevherly sulod sa 10 years. Dihang nasayran sa uban ang kabahin sa iyang pamilya, gitamay matud pa ang iyang inahan ug giisip siya nga illegitimate child. Pinaagi sa pagsalmot niya sa Survivor Philippines, si Vevherly, kinsa 4th year Criminology student sa University of Cebu, nanghinaot nga makaangkon og dungog para sa iyang inahan ug aron pamatud-an nga mamahimo usab diay nga mainila ang usa ka farm girl sama niya.

Jervy “Patani” Daño, Ang Yaya

Human mapakyas pagsulod sa Star Struck, ang 20-year old nga si Patani malaumon nga ang pag-apil niya sa Survivor Philippines maoy iyang yawi aron makab-ot ang kabantog sa showbiz. Natawo ug nagdako sa Camotes Island, pangandoy gyud ni Patani nga mamahimong artista. Niadtong nag-yaya pa siya sa Camotes, naningkamot siya nga makat-on og Tagalog pinaagi sa pagtan-aw og TV shows ug pagsulti pod niini kun ugaling duna siyay mahinabi. Komedyante, ganahan siya mo-arte, mo-host ug mag-model.