Papa ni Jennylyn mipanaw

Pagkahuman og panganak ni Jennylyn sa usa ka himsog nga batang lalaki niadtong Agosto 17, laing kalbaryo na usab ang gipas-an karon sa young actress tungod kay mipanaw na ngadto sa laing kalibotan ang namat-an nga amahan niini kagahapon.

Namatay kagahapon sa tungang gabii ang amahan ni Jen nga si Rogelio Mercado tungod sa grabeng komplikasyon sa diabetes. Nianang Martes sa gabii gidala sa UDMC ang nahisgutan tungod kay naglisud kini sa pagginhawa ug pipila lamang ka gutlo sa pag-abot niini sa hospital kay nakabsan gyud kini sa ginhawa.

Nasayran nga taud-taod na usab diay nga nag-antos sa maong sakit ang 69 anyos nga amahan sa actress ug naputlan na usab ang nahisgutan sa mga tiil niini duha o tulo na ka tuig ang milabay tungod sa komplikasyon  sa diabetes.

Samtang, pwerteng hilak ni Jen sa dihang nahibaw-an niini ang balita sa paggawas niini niadtong miaging Martes gikan sa pagpanganak niini.

Gikahadlok sa pamilya sa actress ang pagsigeg hilak niini tungod kay wala pa kini maka-recover sa iyang pagpanganak ug basin kini pa ang mahimong hinungdan nga mabughat ang dalaga.

Kahinumduman nga tungod sa kondisyon sa iyang amahan mao nga wala mosugot si Jen nga adto manganak sa USA. Nasud-ong pa hinuon niini ang actress ug si baby Jazz sa wala pa kini makabsi sa kinabuhi.

M.Y.M.P maghiusa gihapon

Usa ra ang gipangutana sa tanang mga fans sa M.Y.M.P nga mitambong  atol sa ilang album launch, ang M.Y.M.P Now——last album na ba nila kini ni Juris ug Chin isip usa ka grupo?  Adunay nasagap nga tsika ang PangMasa nga matod pa mag-solo na si Juris. “May solo album na pinaplano si Chin for me, kasi nage-enjoy siya ngayong mag-produce ng album. So far, planning pa lang. Pero solo album ang plano, not solo career,” miklaro si Juris. Gitino usab niini nga dili pa siya andam nga talikdan ang ilang grupo nga dugay na nilang giugmad aron maila sa kadaghanan. Giklaro sad sa nahisgutan  nga dili pa nila last album ang Now ug daghan pa silag mga album nga himuon sa umaabot. Ang M.Y.M.P Now maoy ikaupat nga studio album sa maong grupo alang sa ilang ikalimang tuig nga anibersaryo. Ug ang maong album kay ilang igasa ngadto sa tanan nilang mga supporters ug ipagawas kini ubos sa Ivory Records.

Sam duna nay indie movie

Pwerteng hangyo sa gwapong actor nga si Sam Milby ngadto sa Star Magic nga tugtan siyang mohimo sa iyang primerong pelikula nga dili ubos sa pagdumala sa Star Cinema ug ABS-CBN, ang Cul-de-Sac (Dead End) sa Cinemabuhay.

Mao kini ang primerong pelikula nga himuon ni Sam nga usa ka suspense thriller pagkahuman sa iyang pagdala sa mga pelikula nga drama ug comedy. Matod niini nga interesado na gyud siya nga dawaton ang maong tanyag sa dihang gipabasa siya sa script sa bag-ong director ug scripwriter nga si Juan Miguel Sevilla .

“It kept me at the edge of my seat ang pagka-suspense at ito ang in-explain ko kina Mr. M (Johnny Manahan).  Maganda ang story, ang scipt, maganda ang mysterious character ko, medyo gray,  that I cannot divulge now, kaya nakiusap akong gusto kong gawin at pumayag naman sila.”

Makauban ni Sam sa maong pelikula sila si Jodi Santamaria ug giisip usab niya nga reunion movie ni nila ni Chin-chin Gutierrez, ang nahimo niyang inahan sa Maging Sino Ka Man. Ang Cul-de-Sac (Dead End) kay ubos sa produksiyon sa PLDT-Smart Foundation (PSF), President nga si Butch Meily ug PSF Executive Director nga si Albert Martinez.