Yayo Aguila kinasuhan ni Baron ng perjury

Isinampa kahapon ng aktor na si Baron Geisler sa Department of Justice ang kasong perjury laban sa dati niyang housemate na si Yayo Aguila na ina ng umano’y binastos niyang dalagang si Patrizha Martinez.

Sinabi ni Baron sa kanyang complaint-affidavit na walang kinalaman sa kasong act of lasciviousness na isinampa ni Patrizha laban sa kanya si Yayo dahil nasa Amerika ito nang maganap.

Binago anya ni Yayo ang testimonya nito hinggil sa umano’y pambabastos niya kay Patrizha sa isang bar sa Makati City kaya inireklamo na niya ang ina nito ng pagsisinungaling.

Subalit ayon sa abo­gado ng mga Martinez, ang reklamo ni Baron ay  delaying tactics lamang laban sa kanila dahil sa ang inilagay lamang ni Yayo sa kanyang affidavit ay nang tumawag ang kanyang anak sa kanya at ikinuwento ang nang­yari sa kanya.

Malaki naman ang paniniwala ng abogado na magiging pabor sa kanila ang ilalabas na desisyon ng DOJ laban sa nasabing kaso. (Gemma Amargo-Garcia)