Trailer ng movie nina Sarah at John cute na cute

Nanghihinayang ako, ganundin ang maraming tumatawag sa aking radio program, which is ably run in my absence by Shalala, asking kung totoo raw bang pagtatapatin ang Codename: Asero ng GMA 7 at Iisa Pa Lamang ng ABS-CBN.

Gusto nilang mapanood pareho ang dalawang programa pero, kung totoo ang nababalitaan nila, kailangan nilang pumili ng isang palabas lamang at dito na lalabas kung saang network sila loyal.

 Nagtatanong ang mga TV viewers kung bakit nga kaya kailangang magkaroon ng head on collision kung puwede namang mapanood ang dalawang palabas na parehong may malalaki at powerful cast at talagang ginastusan para mapaganda? Bakit daw kailangang mag-suffer ang isa kung pwede namang pareho silang mag-win? BAKIT?????

* * *

Balitang-balita dito yung matagumpay na concert ni Imelda Papin na mas lalo pang naging matagumpay dahilan sa paggi-guest ni Manny Pacquiao.

Pero di tulad dyan, iisipin na ng lahat na si Pacquiao ang pinanood sa concert, pero di na bibigyan ng credit ang talagang may pa-concert, dito walang ganyang intriga.Tanggap  ng mga Pinoy si Imelda. Katunayan, sell out ang mga con­certs nito dito sa US pero, ang pagi-guest niya kay Manny ay isang magandang tyempo dahil  ka­pa­­panalo lang nito sa boksing. Natural lang na  gusto ng mga kababayan natin na makita at maka­mayan ang Pambansang Kamao. Pero ang kuman­ta ito ay maituturing nilang isang maagang Pamasko ni Manny sa kanila.

* * *

 Akala ko ba walang chemistry sina Sarah Geronimo at  John Lloyd Cruz? Eh, cute na cute ang mga sekretarya ko kapag napapanood nila yung music video ng A Very Special Love. Bagay daw ang dalawa. Sana raw ganun din ka-cute ang movie. Sabi ko naman sa kanila na yung mga es­kena ng dalawa ay mga eksena rin sa movie nila. Sana naman daw dahil may mga pelikula na iba ang napapanood sa trailer kesa sa pelikula. Ganun?!

* * *

Sabi ng kaibigang Ed de Leon, may hip-hop dance battle na magaganap sa Star City sa Agosto 9-10 - P100,000 ang nakalaan sa magwawagi. Lahat ng magpaparehistro ay bibigyan ng isang multi-track CD kung saan manggagaling ang tugtuging gagamitin sa laban. Bibigyan din sila ng Ride All You Can (RAYC) discount coupons na maaring ipamahagi sa mga kaibigang susuporta sa botohan. Maari ring bumoto ang mga bisita ng Star City na sasakay ng RAYC.

Para sa ibang detalye, tumawag sa  833 4484 o 680 3496.