Campus headturner: Kirstie Joan Babor

Simple. Buotan. Maayong ehemplo. Mao kini ang maghulagway kang  Kirstie Joan D. Babor o mas naila sa tawag nga “KOYKOY”. Si Kirstie usa lamang sa daghang maanyag nga mga modelo nga ikapasigarbo sa atong lalawigan nga ikatandi sa mga sikat nga mga artista karon sa nasud. Sa pamilok, mahimong masaypang si Carmina Villaroel-Legaspi kining garbo sa Velez College.

Chinay sa panagway ug dugo si Kirstie. Kamanghuran sa tulo ka mga anak nila ni Filomeno Babor ug Tessie Dy Babor. Sa panuigon nga 21, maingon gyud nga highest level na ang nakab-ot nga kalampusan ni Kirstie sa natad sa modeling. Sa kadaghan sab sa iyang mga naapilan nga mga fashion shows ug mga beauty pageants napakita gayud niya kun unsay ikabuga sa mga Sugbuanon ug nga angay usab siya  maapil sa laray sa matawag nga mga beauty queens ning bag-ong henerasyon.

Pipila lang sa mga beauty pageants nga naapilan ni Kirstie mao ang Ms. Philippines Fame 2004, Ms. Lapulapu 2005, Ms. Mandaue 2006, Ms. College 2007 (interschool) ug Ms. Cebu 2008.

“Everytime mo-join ko og mga beauty pageants makaingon ko nga di man guro ko maapil sa ma-finalist kay daghan man jud ang mga gwapa”. Apan bisan pa man sa kadaghang mga beauties, mulugwa gayud si Kirstie sa iyang mga intrahan nga mga contests tungod kay lahi ang iyang charisma.

Manggiuwawon si Kirstie maong sukad-sukad wa pa gyud kini makasuway pagsud sa usa ka relasyon. NBSB,(No Boyfriend Since Birth), kon sa ato pa.

“Mahadlok ko. Kay mao unya nay makapasakit nako,” sugilon ni Kirstie sa Banat Hugyaw dihang gipangutana kun ngano’ng wa pa kini makasuway og pakigrelasyon o uyab-uyab.

Nadiscover ang beauty ni Kirstie sa usa ka make-up artist nga amigo sa iyang kasamtangang manager nga si Marlon Garcia Wafer atol sa usa ka kasal.

Sa edad nga 14 years old nagsugod ang modeling career ni Kirstie. Nagkadaiyang mga fashion shows ang iyang giintrahan ug sa pag-edad niya og 17 years old gisud na niya ang kalibutan sa  mga beauty queens dihang miapil na siya og mga indigay sa kaanyag. Suportado usab si Kirstie sa iyang mga ginikanan. “Akong mama, she always says nga I should think positive!”

Mitapos og kursong BS Nursing niadtong March 14 si Kirstie ug pagkakaron, busy kaayo siya sa iyang review alang sa umaabot nga board exam nga gitakda karong June 1 ug 2, 2008.

Dihang gipangutana kun wala ba siya maglisud og balance sa iyang oras ilabi na nga nag-review siya ug duna pa gyud siya’y modeling stints, tubag ni Kirstie: Kapoy jud usahay but I’m enjoying man sad.

Alang sa mga gustong makakita kang Kirstie, mahimo ninyo siyang atngan sa iyang mga umaabot nga mga modeling assignments karong buwana sa Waterfront Hotel ug sa Hunyo  usab alang sa usa ka fashion show sa mga wedding gowns.

Sa katapusan gipaambitan ni Kirstie ang iyang motto nga iya sa iyang idolo nga si St. Therese:

“Few of us can do great things but all of us can do small things with great love!”