Birthday party ni Angel ’di inisnab ng Kapamilya

Nag-text sa amin si Becky Aguila para sabihin na naisulat sa isang tabloid na inisnab ng Kapa­milya bosses ang birthday ni Angel Locsin. Paano itong iisnabin gayong wala namang party na naganap?

Ayon pa sa manager, ang kaarawan ni Angel ay sa April 23 pa at ise-celebrate niya ito sa PICC Plenary Hall with Avon para sa paglulunsad ng Avon summer lipstick and Wish of Peace fragrance collection.

Ngayong Linggo naman (April 20)  ay bibigyan siya ng malaking selebrasyon sa ASAP at pagkatapos ay tutuloy ito sa The Good Sheperd Parish sa Regalado, Fairview para sa kanyang gift-giving sa mga mahihirap na bata sa Payatas. Magsisimula ito ng alas-tres ng hapon.

Masaya ang magandang aktres sa pagtatra­baho sa ABS-CBN at maganda naman ang rating ng Lobo. Kuntento siya sa malaking suportang ipinagkakaloob ng Dos.

* * *

Inamin ni Claudine Barretto na tinanong muna niya ang pastor nila from Victory Fellowship kung tatanggapin ba ang karakter bilang ina ng magsi­silang na diablo ang anak. Sinabi nito na ituloy ang teleserye dahil she’s emotionally, spiritually, physically, and mentally equipped to portray the role.

“Kaya tuwing magsisimula kami ng taping ay nagdarasal kami. At ’pag may nakakatakot na eksena, dinadasal ko nang paulit-ulit ang ilang verses sa Bible. Malaking tulong si Rio Locsin dahil naroon sa set ang asawa nito na isa ring pastor,” ani Claudine.

Naroon din sa presscon at preview ng first episo­de ng Maligno si Ms. Susan Roces na nagsabing impressed siya sa ganda ng napanood.

Lahat ay nagkakaisa sa pagsasabi na magaling ang acting ni Rafael Rosell sa Maligno bilang demonyo kung saan hinangaan ang rape scene nila ni Claudine. Ipinakitang hubo’t hubad ito habang nire-rape ang aktres kung saan umani ito ng iba’t ibang komento at reaksyon mula sa press.

Nagpapasalamat nga si direk Wenn Deramas dahil nakapasa ito sa MTRCB kung saan may maseselan na eksena. Magsisimula ang Maligno sa April 28 sa primetime ng ABS-CBN.

Masasabing unti-unti nang gumagawa ng malaking pangalan si Rafael na bukod sa magaling umarte ay miyembro rin siya ng Coverboys kung saan gusto rin niyang makilala ang kaniyang talento bilang singer at dancer.