Barangay Tejero Band Challenge

Haller Tau Gamma Phi, Triskelion Grand Fraternity-Tejero chapter officials and members ug sa tanang chapters sa Alpha Kappa Rho. Mo-haller sad ko’s tanang Fuente Bloods and of course sa tanang Crips nga akong mga silingan sa barangay Quiot. Wave! Wave!

O, hiposa sa nang mga butang nga mahait sama sa sundang, lapis, tinidor ug suwang (ahahhaha!) kay electric guitar atong gunitan rong adlawa. Apan sa dili pa, allow me to greet the members of “Saving Kamagong”. Mao ni ang banda likod sa “Uso Ang Reggae” nga hit karong summer labi na gyod adtong gusto kaayo’g bikini open sama ni Tata Tanoco ug ni DJ Ram Dizon, ug kadtong hilig kaayo’g skimboard sama ni Inday Misyel. Sangay ra ba gyod ning tulo – puros mga Ramil (Ramil Tanoco, Ramil Dizon ug Ramil Albaño. Kadakooo sa biitiinnnn!)

Salamat sab nilang Tito Hermias (drummer, Saving Kamagong) and family sa ilang pag-abi-abi nako diha sa ilang panimalay ug recording/jammin’ studio niadtong Sabado. Belated happy birthday ni Carol Hermias, kapikas ni Tito. Mwahhhhhh! Busog kaayo ko sa tinanok nga kamote nga lami pa’s NFA rice ug niagas gyod ang likido sa akong ilong sa inyong ginamos nga “gihugaw-hugawan” og daghang kamatis. I luv tomatoes!

Ug sushhhh! Kalami gyod mga fwenzter sa ilang sinugbang dalagang bukid (kana bitaw’ng isda nga gwapa liwat sa nagsugba nga puwahon og aping!). Tam-is gyod kaayo abi nako’g gi-asukaran to! Maayo mo diha sa Kamagong, Lahug kay fresh ang inyong isda sa tiyangge bisan hapit na mo maigo sa 93 dash one issue (hee hee!). Di parehas diri sa amo sa may Upper Bayanihan nga klaro kaayong gi-embalsamar ang mga isda. Tuskig sa gawas, pero bungkag inig prito. Mga serpente gyod ning ubang negosyante woi, may la’g sila na lang unta’y malanag sa ilang formalin!

Newayz, I have good news and bad news parte’g banda-banda. Ang bad news is negative ang feedback sa duha ka karaang banda nga akong gipang-contact, supposedly para ma-feature nato dinhi. Alang unta kadto ninyong naghinamhinam na nga makabasa og mga kalamboan mahitungod nila. Kawang ang akong effort kay imbis diha’y mihatag og mga contact numbers, di man sab mo-reply. So akong i-rechannel akong kusog pinaagi sa paghatag ninyo’g advisory nga hapit na nako i-feature ang “Saving Kamagong”. Atangi ninyo ang pagbalik ni Tata Tanoco. Karaan naman kaayo nis Tata kay ka-edad man ni’s radyo nga Avegon (bwahhahaha!) nga dagko kaayo’g baterya. Mobalik siya with some fresh faces (apil pa kaha’s SuperCat chief engineer Tito ani? Peace!). Naa pod sila’y gwapa nga chix nga atong i-feature puhon sa atong Acoustic Wednesday nga segment. That’s the good news! Sori lang gyod kaayo sa mga nag-atang sa mga karaang banda. Nahinayak gyod ko’g announce adto kay abi man god nako’g seryoso gyod sila. Sa pagkakaron ang klarong seryoso mailhan mao ning Saving Kamagong kay tanan nakong gipangayo nila – CD sampler, pictures, profile, band history – gihatag gyod nila. So, roll the carpet gilayon!

Ako lang i-clear no nga bisan kinsa nga banda ug bisan unsa nga genre sa music pwede ma-feature dinhi kun mohatag lang sa mga gikinahanglan nga materyales kay di baya ta pwede mohangad lang sa kisame nya magmugna og detalye. Ang dili lang gyod pwede dinhi kanang mga banda nga hambogero kay mag-global warming gyod akong ulo anang buriton nga feeling wa’y kamatayon.

Back to Saving Kamagong. In fact, karon gyod untang adlawa nako ihatag ang espasyo alang nila pero love man nako si Konsehal Garry Lao sa barangay Tejero kay parehas god mi nga Boy Scout. Trulili na siya nga bisa’g girl ko, ni-a ko na-belong sa Boy Scout Movement as Rover Scout. With Eric Descallar, ang adviser sa Tau Gamma Phi, Triskelion Grand Fraternity-Tejero chapter, gipahibalo sa duruha nga “barangay Tejero will be holding an inter-sitio amateur band contest”.

Karon na ning Sabado, April 19 mga fwenzter. Anha sa Tejero Sports Complex sa T. Padilla Extension, ning dakbayan, gikan 6 p.m. hangtod na ni’s lawom nga kagabhion ug pagtuktugaok sa mga manok nilang Papa Bryan Gayon ug Papa We-we (mga ungo sa online games ning akong mga chatmates woi!).

Matod pa ni Eric Descallar nga first time diay ni nga matang sa event diha’s Tejero. The event is dubbed “April Fools Rock sa Villagonzalo”. Usa kini sa mga events sa ika-unom nga founding anniversary sa Tau Gamma Phi-Triskelion Grand Fraternity-Tejero chapter.

Nagkanayon si Eric nga, “the activity is a project of the organization deemed at channeling the energy of the youth in worthwhile activities supported by Tejero barangay chairman Jessielou “Jijing” Cadungog and barangay kagawad Garry Lao.”

Bukas ang maong band challenge sa tanang pundok nga “bonafide residents of Tejero,” niya pa. Mga pundok nga adunay “talent in music and have the potential to become future professional musicians.” Naa kaha ta’y future ani Ryan Mark?

Nagpasalamat si Eric nga ang kalihokan gitambayayongan sa mga nakasabot sa kawsa sama sa M. Lhuillier, Gothong Shipping Lines, CENAPRO, Sulpicio Lines Inc. (c/o Mr. Enrique Go), Federal North Hardware, OPASCOR and Auto Mekanika.

Mapalit ang tickets sa tag-P25. Available ni sa Office of the Barangay Chairman.

Samtang ang mga entry forms and guidelines alang niadtong interesado makipagrakrakan karong Sabado adto makuha kang Ms. Natalie Mendiola, anytime during office hours.

Ang mga mananaug makadawat og mga premyo ranging from cold cash (unsaon paggasto ani Tata T.?) to trophies. Bisan ang consolation prize, adunay madawat nga tropeyo, as guaranteed by Eric Descallar.  Based on Eric’s update, pito pa kuno ka pundok ang nagparehistro.

Napulo ka grupo ang ilang gi-target nga entrante. Ang mga nakaparehistro na mao ang mga bandang Coneited Invictus, Loss of Cadence, Last Heroic Attempt, Eggnog, Ruthless Seven, Tropical Roots ug Saeyoushen.

Ang deadline sa pagpalista ugma pa, Abril 17. So, mga bonafide Tejero residents, duna pa mo’y dakong panahon sa pag-inquire sa barangay hall. Sukit-sukita gyod ninyo’g maayo ni’s Ms. Natalie Mendiola kun asa niya gihiklin ang mga entry forms and guidelines.