Madonna, klik lang gihapon; Abyss, BTU, et. al. banhaw

Haller sa tanang fans ni Madonna Louise Stephanie Ciccone aka Madonna, the pop icon. Gitunol bag-ohay pa lang ngadto kang Madge (iyang dagnay) ang prestihiyosong Rock and Roll Hall of Fame award atol sa usa ka induction ceremony nga didto pagahimo-a sa New York . Gani, uban tingali kaninyo nakasaksi man nga si Justin Timberlake (ex-N’Sync member) maoy mitunol sa award ngadto kang Madge nga karon 49 anyos na. Samtang ang rock icon nga si Iggy Pop mi-cover sa Ray of Light (1998) ug ang The Stooges mihatag sa ilang bersyon sa Burning Up (1985).

Mao ni nakanindot sa mga musikero sa laing nasod kay magkadugay sila sa industriya magkadako ang ilang bili, dili sama diri sa ato nga hain tong lapad og kasinatian magkadugay makatagamtam sa pangantalita kay lagi nagkalaos na imbis magkadugay magkalami, magkadugay magka-depreciate ang value. Mas abibahan pa ang mga batan-on nga mga bag-ong sulbong ug presko’g dagway bisan pa’g dunay kakulian sa kasinatian.

Dungan sa pagtunol ngadto kang Madonna sa Rock and Roll Hall of Fame award, misantop sad sa akong hunahuna ang dakong pangutana: “Ngano kaha no nga bisan og natiguwang na si Madonna, klik man gyod gihapon siya sa tanang panahon?” Bisan gani si Justin Timberlake miangkon nga daghan kaayong Madonna wannabees. Gani ubay-ubay sab kuno siya’g na-date nga mga gusto magpaka-Madonna. Nagpasaring siya sa iyang ex nga si Britney Spears. Apan matod pa ni Justin, “there can only be one Madonna.”

Gawas sa mga pagsaway nga iyang nadawat sa sayong bahin sa iyang career, gipamatod-an ni Madonna nga magmalamposon gyod diay ang tawo nga matag karon ug unya mo-kwestiyon sa iyang kapasidad. Bisan pa man og daghan ang miingon kaniya nga “talentless siya, chubby (kaniadto), nga dili siya kahibalong mokanta, nga one-hit wonder lang siya” nagpasalamat siya kanilang tanan.

“They inspired me because they made me question myself repeatedly and pushed me to be better,” pu’ng ni Madonna sa iyang pagdawat sa maong award.

Sa akong pag-aninaw, klik si Madonna sa tanang panahon tungod kay wala man gyod siya moundang sa pag-reinvent sa iyang kaugalingon – sa iyang musika, istilo, sa iyang imahen, sa iyang adbokasiya, sa iyang ispiritwal nga kinabuhi.

Gikan sa pagka-material girl ug pakigrelasyon sa mga bad boys nga silang Sean Penn ug Dennis Rodman ug daghan pang mga dili mabangbang nga mga abusadong lalaki sa iyang kinabuhi, nakatilaw ra sab og liberation si Madonna sa dihang gipili niya ang paggakos sa Kabbalah, usa ka sekta nga salingsing sa Hudaismo; pagkahimong responsableng inahan ngadto kang Lourdes Leon (anak niya kang Cuban actor Carlos Leon), Rocco (anak niya kang Guy Ritchie nga film director) ug pagsagop niya sa usa ka Malawian boy atol sa iyang panaw ngadto sa Malawi (Africa) pagpahigayon og mga buhat sa kalooy. Wala sab moundang og buhat og music videos si Madonna. Gani, chartbusters gihapon kini bisan pa man og daghan nang mga artists ang nangguho. Ug matag kanta niya sakay ug haom sa panahon aron maka-touch base siya sa mga tigpaminaw. Nakalingkawas na sab siya sa mga kantang “too radio” paminawon. Wala sab mahupas ang iyang terpsichorean prowess, Ug bisan tinoora’g dili gyod siya ingon kanindot og tingog nilang Barbara Streisand o ni Celine Dion, nagmarka ang iyang performance sa “Evita” diin gidayeg siya nilang Andrew Lloyd Webber ug Alain Boublil dili tungod kay makakab-ot gyod siya’g tag-as nga nota kundili tungod kay bukas kuno kaayo si Madonna sa kritisismo. Gusto kuno kaayo kini nga koreksyonan kun ang katuyoan mao ang paglambo sa iyang talento. Gihulagway sab siya nga kugihan, determinado ug mapaubsanon bisan pa man sa iyang kasikat, kaprangka ug ka-liberated.

Good news sad sa tanang fans sa British 60s band Dave Clarke Five kay nahiapil sab sila sa listahan sa Hall of Fame. Apan tulo na lang kanila ang midawat sa maong pasidungog.

Speaking of reinvention, nalipay ko sa paghibalik sa “Smash Sundown” kay mao gyod ni akong kinaham nga programa sa high school pa ko. Daghan kaayong platong nabuak (hee hee) aning programaha inig human og ingon sa voice over nga “Sundownnnnn”. Ma-smash gyod ang bandehado (haa haa). Sa maong programa nako nasinati ang gahom ug impluwensya sa mga karaang rockista. Ug dungan sa paghibalik sa “Smash Sundown” sa kahanginan ang pangaliya nga unta matagaan sab og katumanan ug kalamboan ang mga tingusbawan sa CebuMusicFactory nga gilangkoban sa mga Cebu-based bands and personalities “aiming to relive and revive LOCAL GROUND music, circa 1990.”

Yesireee, banhaw na ang 40, Ledger Line, Beyond the Unknown (BTU nga akong aydol!), The Abyss, The Ire, The Monks, Armand and the Sikatuna Rappers, A2Z, The End, et.al. Ato ni silang tagsa-tagsaon og feature puhon aron ato pang masabtan ang ilang catchphrase nga LOCAL and VOCAL. LOUD and PROUD.

Dili sila buot nga ma-define ang Cebu sa usa lang ka music genre sama sa Bisrock mao nga naningkamot sila nga mahibalik sa Cebu music scene aron ipalanog ang mga kantang (in reels pa gyod hapz?) dugay nang gipanghapnig sa kaban. Congratulations guyz and hope for good na gyod ni inyong pagkabanhaw. Taga-i mi’g mga kanta nga maghubit sa atong kulturang Sugbuanon. Maayo untag lakip sab nga mobarog pagbalik ang Meduza Taciturn ug Feminine Mode para naa say modala sa tingog sa mga kababayen-an.

Alang sa buot makighimamat sa mga karaang astig nga rockista sa Cebu, bisitaha ang ilang webpage - www.cebumusicfactory.com.

For violent reactions, text me at 09215323616. Crank up my addy at [email protected] or visit pinaymangatkatay.multiply.com