Janina San Miguel: Innocent girl who would be queen

Taga squatters area sa Quezon City ang 17-anyos nga dalaga kinsa Mass Communications freshman sa University of the East.

Jeepney driver ang iyang amahan, hinungdan nga dili sila mapatungha niini sa kolehiyo. Pwes, ang paagi nga nakita ni Janina mao ang pag-apil og mga fashion shows aron duna siya’y ibayad sa iyang tuition. Nadiskobre siya sa talent scout nga ginganlan og Rory Rellos ug gipaila ngadto sa trainer nga si Jontie, ang nag-galam sa duha ka mga kandidata nga sila si Eizza Lim ug Margarita Gutierrez. Apan taod taod una mipatim-aw si Janina sa shop ni Jontie Martinez. Natigayon kini atol sa unang press presentation sa Bb. Pilipinas sa Mandarin Hotel. “Nahihiya po kasi ako lumapit sa inyo hanggang di pa po sigurado na pasok na ako,” pasabot ni Janina ngadto ni Jontie nganong wala dayon siya miduol ug nagpa-train sa team niini. Una niini, migawas ang istorya nga walay plano si Janina nga mosalmot sa Bb. Pilipinas ’08, igo lamang siyang mitekang sa Araneta Coliseum out of curiosity. Pag-abot niya sa Araneta, gitunolan siya og application form, gipirmahan niya ug gi-screen na dayon siya. Pagkakita pa lang ni Jontie kang Janina, nakita na niini ang dakong potential sa dalaga, sakto ang height (5’11) maayo ang bone structure. Pero sayod si Jontie nga hilaw pa si Janina busa midisisyon sila ng sagupon ang dalaga ug kun dili man gani siya manimaho karong tuiga, tudloan siya aron pasalmoton og balik mga duha o tulo ka tuig gikan karon. Misugot ang dalaga nga wala magdahom nga dunay laing plano ang kahigayonan kaniya.

Sa mga pageant activities, kanunay siya nga pangutan-on ni Jontie kumusta siya, pahuwamon og sapatos, gowns ug uban pa. Gipasabot na siyang daan nga tungod kay hilaw pa kaayo siya, matabunan gyud siya sa mga beteranang kandidata.  Dako silang sayop sa maong pagtuo.

Sa pageant night, wala ray pakialam si Janina. Samtang nagkisikisi ang ubang kandidata ug naghinamhinam, ang 17-anyos nga dalaga mura rag walay nahitabo. Naguol pa gani kini tungod kay nalimot siya diin niya makalimti ang iyang cellphone.

Dihang gipangumusta sa backstage, tubag ni Janina, “Hindi naman po ako kinakabahan tito.” Susama matud pa og gamay’ng bata si Janina nga nagduwaduwa lang, wala magdahom unsay nagpaabot niya. Pwes, ang maong attitude niya nga wala magdahom maoy mipasidlak niya sa entablado. Nasorpresa ang mga magtutudlo niya dihang gilangkat niya ang Best in Swimsuit Award ug mipadayon  pa pag-angkon sa Best in Gown Award.

Aminado ang mga nagpakaila kang Janina nga sa Q&A  milugapak gyud ang dalagita, pero malaumon sila nga ang ka inosente ug kamatinud-anon niini maoy makaluwas niya gikan sa mao niyang pagkahagsa.  Sa backstage mihilak ang dalaga, midangoyngoy ug milenggua: “Eh talaga naman 17 lang ako at unang pageant ko lang naman eto eh. Bakit sila ganoon tito? “
And the rest is history. Suma pa nga sa ilang pagpauli mga alas tres na sa kadlawon naglisod pa gihapon og tuo si Janina nga duna na siya’y titulo. “Tito tutoo po ba yung nangyayari ngayon? “ Ug sama sa ordinaryo ni nga babaye, walay laing gihisgutan si Janina samtang diha sa sakyanan, kini mao nga mobalik na siya og tungha ug rampa sa mall.

Pero ang kamatuoran mao nga dili na siya ordinaryo nga babaye. Siya si Janina San Miguel, ang Bb. Pilipinas World 2008, kinsa giuwan man og pagsaway ug intriga, wala matarog ug malaumon nga ikapasigarbo sa Pilipinas human unya sa Miss World Beauty Pageant sa Ukraine karong Agosto. (Gikan sa Internet)