“Bisrockathon”

Sulod sa tulo na ka tuig nako  nga pag-anchor sa programa Bisrockabataan daw dili gyud ikabaylo og salapi ang akong kahimoot nga hangtud karon nagpabilin gihapon ang kakusog sa Bisrock ug syempre lakip napud ana ang walay pagkupas nga kainit sa mga Bisrockers sa pagsuporta sa mga mugna nga kanta nga Bisaya. Daghan na pud ang mga banda nga misulbong ug mga kanta nga bag-o nga nailhan, gani nahatagan pud og airtime  sa radyo ang ilang mga kanta. Pero luyo sa maong kalambuan adunay mga mitumaw nga pangutana, hain naman ang mga karaang kanta nga Bisrock nga mas una natong nadungog ug nailhan? Panagsa nalang nato ma play. Tingali sa kadaghan na sa mga bag-o nga kanta, panagsa nalang ma play ang mga karaan nga kanta.Labi natong mga nindot gyud nga kanta sa Missing Filemon, Scrambled Eggs, Aggressive Audio, Ambassadors, Phylum, Indephums, Mantrequilla, ug uban pang karaang banda nga pioneer sa Bisrock music.

Kasagaran gyud sa mga tao nga nangutana nako ana sila pud kadtong mga tao nga una pud nako nakaila tungod aning akong pag advocate sa Bisrock. Syempre adunay mga pagbalik sa mga pinagsamahan sa una kung giunsa nako sila pagkaila ug hangtud karon nagpabilin lang gihapon ang among mga panag higalaay.

Aron pagtubag sa maong mga pangutana,mas gipahugyaw og samot nako ang programa BisrocKabataan karon sa bag-o nga segment nga BISROCKATHON. Mao kini ang muhatag og agianan sa mga karaan nga kanta sa una nga dugay napud nato nga wala madungog. Atong e-play og balik aron dili pud malubong sa limot ang maong mga kanta.

Pinaagi sa BISROCKATHON ato pa nga mapakusgan og samot ang atong kawsa sa pag-advocate sa pinulongang Bisaya. Magsilbi pud kining sumbanan kung asa ug unsa na ang naabtan sa Bisrock.Mahimo  pud kini nga hagit sa mga bag-o nga banda nga unta mas ayohon ug mas palamboon pa nila ang ilang mga abilidad kay aron dili sila mauwahi sa train,(hehe), ug mawala sa scene. Nga unta kitang mga rockista ato gyud pirme hinumduman ang panultihon nga “Matira Ang Matibay.”