Eat Na Ta TV patok sa Cebuano

Ayaw paawat ang Eat Bulaga sa pagkiliti at pagpukaw sa puso kahit saan kabilang na ang Cebu kung saan sikat na sikat ito pati na ang local version nito, ang Eat Na Ta TV.   Eto ay mapapanood tuwing Sabado sa GMA 7 Cebu at Eat Bulaga mula Lunes hanggang Biyernes sa GMA-7.

Kasama sina Papa Joe, Cutie del Mar at Undoy Z bilang mga hosts, ang Eat Na Ta TV ay ang pre-programming show ng Eat Bulaga na mapapanood sa GMA-7 at kasabay namang maririnig sa DYSS Super Radyo sa Cebu.

Ang Itaktak Gyud sa Cebu ang lokal na bersyon at halaw sa Taktak mo o Taktakbo ng Eat Bulaga. 

Halos pareho lamang ang elimination process ng Itaktak Gyud sa Itaktak Mo o Tatakbo. May pagkakataong paikutin ng nanalong kalahok sa elimination round ang roleta ng Itaktak Gyud kung saan may tsansang makapag-uwi ng P20, 000.

Pero higit pa rito ang target ng mga sumasaling kalahok dahil mas marami ang may gustong makakuha ng espesyal na bahagi ng roleta – ang dalawang Eat Bulaga logo.  Sa Eat Bulaga logo, instant cash prize na P5000 ang maiuuwi ng Itaktak Gyud contestant bukod pa sa libreng roundtrip plane fare, libreng hotel accommodation at ang pagkakataong makapaglaro sa Taktak Mo o Tatakbo sa Eat Bulaga at maging isang milyonaryo!

Idagdag pa na ang suwerteng contestant ay may espesyal na pagkakataong makita at makasalamuha ng malapitan ang mga sikat na hosts ng Eat Bulaga sa pangunguna nina Senador Tito Sotto, Vic Sotto at Joey De Leon kasama sina Allan K, Ruby Rodriguez, Michael V, Francis M, Julia Clarete, Pia Guanio, Pauleen Luna, Jose at Wally.

Bukod sa Itaktak Gyud, napukaw rin ng Eat Na Ta ang puso ng mga Cebuano sa segment na Ang Akong Pangandoy, isang madamdaming bahagi ng programa kung saan tinutulungang matupad ang simpleng pangarap ng isang letter-sender.

Ang Itaas Iubos…Imong Bulsa Mabdos naman ang isa pang segment sa Eat Na Ta na kinatutuwaan ng mga Cebuano.  Tampok si Undoy Z, isang anime-inspired character na umiikot sa Cebu upang maghanap ng mga nanonood ng Eat Na Ta. Ang mapipiling manonod ay makakatanggap agad ng cash prize at may pagkakataong madagdagan pa ang pera nito sa paglalaro lamang ng isang pocket game na dala ni Undoy Z. (PG)