Kimerald gikagubtan sa Taiwan

Nag-premiere sa Taiwan adtong Lunes sa gabii ang teleserye nila ni Kim Chui ug Gerald Anderson nga “Sana Maulit Muli.” Giuluhan na kini og “Chances” diin gideklara matud pa nga “international day of  love” sa Taiwan adtong Lunes, gumikan sa paglugwa sa maong teleserye. Sa usa ka Taiwanese website gihulagway nga labing malampuson nga teleserye sa Pilipinas sa 2007 ang “Sana Maulit Muli,” diin ang mga dagway nila ni Kimerald ang nagbanig sa maong website. Gihulagway usab sila si Kim ug Gerald nga mga household name sa Pilipinas gumikan sa maong teleserye. Ang theme song niini nga “Sana Maulit Muli” nga giawit ni Gary V. mao usay gigamit didto sa Taiwan, suma pa sa taho.  

KC  bag-ong UN Ambassador

Si KC Concepcion ang labing bag-o nga Ambassador Against Hunger for United Nation, human sa makuting proseso nga milungtad og tulo ka buwan. Ang mga opisina sa UN nga nahimutang sa Rome, Vatican ug Thailand maoy mikilatis ni KC.

Unang aktibidad ni KC mao ang paglupad niya paingon sa Pikit South  Cotabato adtong  Lunes alang sa feeding program. Karong adlawa matud pa sa PangMasa mobalik na si KC sa Manila ug gipaabot nga pormal na nga mopirma didto sa buhatan sa UN alang sa bag-o niyang katungdanan.

Samtang ang Maalaala Mo Kaya episode ni KC adtong Biyernes base sa resulta sa survey nga giluwatan sa AGB Nielsen mitala og 17%, rank number 10 kini sa tanang mga shows nga gitan-aw sa mga panimalay nga nahimutang sa Mega Manila households adtong gabhiona. Apan matud pa, mas taas kini itandi sa mga rating nga natala sa nakalabay nga episodes. Dungan niini, si Richard Gutierrez nga giisip na karong Valentine Box Office King of the Philippines gumikan sa kalampusan sa “ My Bestfriend’s Girlfriend” nagpaduding dihang gipangutana kun namisita na ba siya ni KC ug nahimamat na ba niya si Megastar Sharon Cuneta, human sa iyang pag-angkon nga giregaluhan niya ang dalaga adtong Feb. 14, nga gikalipay niini, miingon nga kun unsa man gani ang relasyon nila karon gikalipay niya og maayo.

Miingon hinuon si Richard nga nagpaabot siya og tukmang panahon sanglit pareho silang duha ni KC nga gikan pa sa failed relationship. (Ryan Mark)