Antonio’s Madness aduna’y Hideout

Haller, peepz! Mikilab lang ang duha ka buwan nako nga maternity leave ug naka-report na ko’g balik sa akong workstation.

Hinaut pa unta nga ana-a kamo sa maayong panglawas ug padayong nagpakli-pakli sa Banat News nga matod pa’s pipila ka mga tigpaniid, naabot na kuno sa amo sa Surigao City (hay, salamat!). Maradjao karadjao, Surigao!

Sa wala pa mapupos ang mga nahibiling adlaw sa tuig 2007, nahinabi nako si Antonio “Yogi” Alister Tejero. The name may ring a bell to some labi na gyod ninyo dihang mga karaang rockista dinhi sa dakbayan nga pamilyar sa bandang Dezeree (1992-1996) sa wala pa kini pagatawga’g “Antonio’s Madness”. Si Yogi ang bokalista sa maong banda.

Makadaghan nga higayon nga gi-contact nako si Yogi alang sa usa ka pagpakighinabi aron masayran kun unsa na ang nahitabo sa ilang mga paningkamot, sa ilang pakigbugtaw nga mailhan isip Sugbuanong banda nga may seryosong musika apan milanat gyod og taas nga panahon usa moabot ang tukmang takna nga madayon ang among panaghinimamatay.

Sa dihang gilusad ning maong pamantalaan ang adbokasiya pagpaluyo sa mga Bisdak nga mga rockista, akong nahisgotan sa akong previous columns “Band Influence” ug “A Space in Space” sa The Freeman ang bandang Antonio’s Madness isip usa sa mga trailblazers sa pagduso sa akong gitawag og “band-ism” dinhi sa Sugbu. Kabahin ang Antonio’s Madness sa Brown Underground Soundz nga gipasiugdahan ni Bernie Quiros alyas Ka Pedro (dyRT) niadtong early 90s nga mao sa’y pagsulbong sa Pinoy alternative rock.

Tungod kay mga bag-ong kaplag na ang mga banda nga kasagarang giabibahan karon, daghan ang kanhi mga magdadayeg sa Antonio’s Madness nagtoo nga nabungkag na gyod ang banda. Apan pinaagi sa imbitasyon ni Yogi nga duawon ang Hideout Bar diha sa Limbong Street, Mabolo (kung wa ko masayop, ikaduhang eskina gikan sa likod sa Mabolo Parish Church), akong nasayran nga wala pa diay matun-as ang usa ka haligi sa gipanday nilang mga damgo nga manglipang ang Bisdak rock sound dinhi sa ato.

Kun karaan kang rockista ug pamilyar ka sa “Instinct of Man” (which goes a little something like this: As I open my eyes/I see smoke/and blood/and black clouds up in the sky/and blood is floating in the mud…Man fighting man for power/Guns are instruments but with nothing to gain…), imong masabtan nga buot unta sa Antonio’s Madness nga mosibaw ang mga tema nga nagbatok sa nuclear warfare. Ug tungod kay Yogi sounds a lot like Darius Rucker, the mainman of American rock band Hootie and the Blowfish (South Carolina, USA), gigamit niya ang impluwensya sa Hootie sa pagpalabang sa maong mensahe. Nasundan ang Instinct of Man og lain pang mga komposisyon – Time, Let Her Cry ug Hold My Hand nga pipila lamang sa walo hangtod 16 tracks nga na-record sa banda in reels kay dili pa man available ang technology sa CD burning niadtong panahona dinhi.

Mapasigarbohon ang Antonio’s Madness nga gilangkoban nilang Junz “B-Flat” Luzada (lead guitarist/back-up vox), Vladimir “Leeboy” Dagami (lead guitarist/back-up vox), Ronald “Bangkay” Baruma (bassist), ug Jay “Jpok” de Guia (drummer) sa operations karon sa Hideout Bar nga gipangunayan ni Yogi inabagan sa iyang mga igsoon ug pipila ka mga higala isip events specialists.

Pinaagi sa Hideout Bar, mapalanog gihapon nila ang ilang musika labi na gyod ang ilang mga orihinal nga komposisyon susama sa “Maghapong Panaginip” (all about daydreaming), “Seasons” (usa ka lovesong) ug ang “Inday” nga tinagik sa Binisayang pinulongan. Nakatabang usab kuno ang maong bar nga ilhon ug tagaan og higayong magka-jamming ang mga karaan ug bag-ong banda pinaagi sa Old School Rocks event, Bisrock Rules, Acoustic Nite, Reggae Republic, Tingog Tribu, ug Hideout Club Music/RnB shows nga gidesinyo sa mga “events specialists of the house” nga silang Mercury Montebon, Jimboy Hanopol, Kim Tejero ug Kylle Tejero.

Ang Antonio’s Madness usab ang tingog likod sa “Kausaban kang PJ (Pablo John Garcia)” campaign jingle nga matawag nila’g usa sa mga dagkong proyekto nga gitanyag kanila. Kini human nila kapamatud-i nga kasaligan sila sa maong proyekto ginamit ang ilang kahanas ug kalapad na’g kasinatian sa pagpanukar. Niadtong 1996, sila ang nigawas nga mananaug sa “Best in Jingle” contest alang sa usa ka promotion sa ABS-CBN Central Visayas. Samtang niadtong 1997, nakadaug sila sa usa ka band competition nga gipasiugdahan sa Triple-V Express sa SM City-Cebu. Sa tuig 1998, sila usab ang nakalangkat sa unang ganti alang sa jingle-writing contest atol sa Oktoberfest nga gilusad sa San Miguel Beer alang sa ilang komposisyon nga giulohan og “Uhaw”. Samtang sa tuig 1999, nasulod sila sa RJ Music City Regional Finals ug nahilakip sa Top 5 sa RJ Music City National Finals.

Alang sa buot masayod sa uban pang events ug shows sa Hideout Bar ug catering services labi na gyod alang sa mga birthday bashes, anniversaries and other special occasions, tawag sa 4133616, o ni Yogi sa 09276988255 ug kang Jimboy 09155156787. Mahimo sab nga maka-guide ang maong mga contact persons kun ugaling gusto ninyong mokatkat sa mga pipila ka bukid dinhi sa ato tungod kay susama nako, mangatkatay usab kining mga tawhana, mga nature worshippers and outdoor people. Affiliated sila sa Cebu Mountaineering Alliance ug sa Emergency Rescue Unit Foundation.

Abli ang Hideout Bar gikan 4 p.m. hangtod 2 a.m. kada adlaw. Aduna’y featured band matag Biyernes ug Sabado. Samtang duna’y free videoke matag Domingo, Martes ug Huwebes. Kay unlimited man ang videoke, unlimited sab ang paggamit sa platform aron maka-simulate sa performance mapa-mellow or hard rocker ka man. Wala’y problema sa pagbitbit og mga bata tungod kay wholesome family entertainment ang giandam nga atmosphere sa Hideout Bar.