Mga anghel, Basakanon, ug Siloy midagsa sa amo

For the very first time in the entire history of the Sinulog, ato pang Domingo, Enero 20 nga, ang mga contingents miagi gyod didto’s amo, busa kun motambo mis among bintana, klaro gyod intawon kaayo ang mga artistang namatong sa float. Mao nga, kinsa pa ma’y moadto’g layo? Nakita namo sila’s Pauleen Luna, Melanie Marquez, Yayo Aguila, Baron Geisler, JC Cuadrado, ug yes, si Angel Locsin nga nag-concert pa gyod tungod sa akong harianong panimalay ug uban pa.

Nahugyaw gyod kaayo ang katawhan sa amo, labi na kay usahay mohunong man gyod ang mga contingents. Ang contingents gani sa Daanbantayan, migamit pa sa among CR. Gikaistorya pud gyod nako si Pauleen Luna, kay kadtong regional coordinator sa Renew Placenta nakaila nako, ug gipaila ko niyang Pauleen. Pag-agi pod sa New Placenta, nag-istoryahanay na sad mi’g si Victor Acosta, kadtong former Mr. University nga usa sa mga haring gangis sa Psalmstre Enterprises. Kay kini’s Victor Acosta baya, ni-sponsor ni sa Barangay Sweetheart kaniadto, ug mikanta pa siya kadtong time nga diha ang coronation sa Barangay Sweetheart sa Plaza Fair, maong friendship kaayo mi. Unsaon kaha no, nga friendship man sad mi’g kadtong ilang Pauleen Luna? Magkaboang gyod ta ani nila.

Anyway, gawas sa mga artistang mipatong sa mga float, ang mga props mismo sa mga contingents, nakapalingaw gyod sa taga amo diha sa Bacalso Avenue [atbang sa Central Fire Station] labi na ang mga bata, kay gisayonan mo nga, midagsa mas among tungod ang mga Zaido, may mga anghel pa, ug ang mga props sa Sinanduloy, mga saging sa Basakanon, mga kalabasa ug ang Siloy, diha gyo’s among tungod, namahuway intawon, kay gikapoy ang siloy sa Alcoy. Mao nga wa pa gani mahuman ang Sinulog, daan na ming nahibawo kun unsay modaog. Gikaistorya pa nako si Barangay Lahug Captain Mary Ann delos Santos ug ang mga taga Consolacion, sige’g hangyo nako nga makigparetrato kay mga “fans” kono sila nako [O, di ba?] Diha pa gyod sa among tungod mihunong sad ang duha ka float sa M. Lhuillier Kwarta Padala. Ang usa, gisakyan nilang maam Malou ug former finalist sa Ginoong Mandaue nga si Michael Roma, ug ang usa, gisakyan sa mga models ni Marlon Wafer; so diha gyud intawon ang kauban namong artista sa “Tres Metros” nga si Greg Lawas nga gapakita sa iyang lawas nga tataw kaayong medyo miburot na ang tiyan. Pagbantay Greg kay mo-turn over raba diay ka’s imong korona isip Mr. Mabolo tuod.