Ang kontrobersiyal nga theater owner

Yess, mga Manash! Promise, dili na ko maagnas kun dunay magtinagalog, after nako madungog ang explanation ni Josie S. Pereyra kun ngano tong may dialogue sa movie nga “Sakal, Sakali Saklolo” nga nagkanayon, “Bakit ninyo pinalaking bisaya ang apo ko..?”  Kun wa mo masayod sa explanation, balika’g basa ang Saturday (January 12) issue aning Banat News Hugyaw. So, puwede na mong magtinagalog atubangan nako anytime, ug promise nga dili na gyod ko maagnas nga maminaw.

Hinoon, hangtod ron, maagnas pa gyod ko sa mga artistang mga BISDAK  [nga bisa’g pila ra intawon ang talent fee] nga nagsugod na’g panagko ang mga ulo, ug feeling sikat na gyod, feeling hawod, mora’g wa na’y katapusan ang ilang kasikat ug mora’g pila na ka mga milyones ang ilang deposito sa bangko, gikalimtan ang nahitabo sa ubang mga nangaging mga artista nga midagko ang mga ulo. Mao na’y hangtod ron, makapaagnas nako, mga manash. Usahay hinoon, ihangad na lang nako sa langit ug moingon nalang ko, ‘Lord, ikaw na’y bahala ani nila.”

Anyway, last year, nahimong kontrobersyal ang usa ka theater owner sa iyang mga display aron pag-attract sa mga tawo sa iyang sinehan nga New Eden Theater ug New Cinema Theater. Siya si Mr. Vic Alvares, usa ka Zamboangeño nga dugay nang nagpuyo dinhi sa Sugbu, pero certified member pa sa pundok sa mga taga Zamboanga dinhi sa Sugbu nga kanunay’ng nagbuhat og mga maayong kalihokan para sa mga deserving nga mga poor. Ang unang nakahugyaw sa mga tawo nga display sa iyang sinehan mao tong two years ago nga gikwestyon ang display niyang mga three kings sa iyang sinehan pero sila si anhing FPJ ug uban pa ang gihimo niyang mga hari. Karong bag-o, mao tong sila si Erap ug  GMA,  gihimo niyang Virgin Mary ug St. Joseph nga, hasta kono si Dr. Rene Bullecer wa makauyon.

“Unsay imong reaction sa nahitabo?” Ako siyang gipangutana. “I’m made…” Mao ray iyang tubag. Wa kono niya damha nga himoong dakong issue kay wa siya’y laing tuyo kun dili peace ra sa bisan kanus-a.

Tuig 1976 pa nakong gikaila si Vic, pero low profile gyod, ug gusto niya, ang iya rang negosyo ang angayang mailado, dili siya. Distributor lang siya’g  mga pelikulang gitawag og mga “pinilian’ ug siya ra ang mag-promote. Sa hinayhinay nakatukod siya og usa ka entertainment joint sa Mango Avenue, apan mipahuway siya, ug pagbalik, siya na’y nag-operate sa New Eden ug New Cinema theaters ug may kaugalingon siyang paagi sa pag-promote sa mga pelikulang isalida sa duha ka sinehan.