“Jud Morning Oi!”

‘We’re friends ni Yuri, that’s why ayaw mo kahibung nga usahay makit-an mi ninyo nga mag-istorya, kompetensya ang among programa kaniadto apan wala kini koneksyon sa among panaghigalaay,” tataw sa kanhi host sa Sunday talk show sa abs-cbn “Jud Morning” Bacalso, niadtong mitekang sila sa OkRyan sa dyLA niadtong Disyembre 5.

Kauban ni Jud isip guest sa maong birthday special sa host nga si Ryan Mark, mao ang pambato usab sa bag-ohay lamang nanamilit nga Oi! Show Nato Ni, sa GMA-7 nga si Yuri.

Sanglit special presentation man ang mao nilang pagtekang, nilain ang format sa maong show diin duna silay tag 15 minutes aron magbawos bawos og pangutana sa usag usa, butang nga dili mahimo kaniadto tungod kay manag-atbang man ang ilang mga pasundayag sa local television.

Unang nangutana si Jude giunsa ni Yuri pagsugod sa telebisyon. “Actually, before nagtrabaho ko sa usa ka cellphone company, dream na gyud nako daan  ang mosulod sa field sa production, maong ni-apply ko sa GMA -7 Cebu as production assistant apan wala ko magtuo lakip ko nga makita sa TV sukad naapil ko atong binayot nga portion sa Singgit Cebu ang Mega Lala,” paambit pa ni Yuri.

Si Yuri associate producer sa Oi kaniadto, hinungdan nga wala sila magtuo nga mapili siya isip host sa maong programa sa pagsugod niini kapin na sa duha ka tuig ang milabay.

“During auditon sa Oi!, nitabang pa gani ko sa pag-panglista, kalit lang ko gitawag sa mga dako sa Manila nga pasak-on ko sa stage aron mag-host-host kay paresan sila Recca,  nahibong lang ko og kalit kay pagtaod-taod giingnan na lang ko nga usa nako sa mga host  sa Oi!  nga bag-ong tukoron niadtong higayona,” hinumdum ni Yuri.

Gipasalig ni Yuri nga kun unsa man gani ang iyang nahuptan ug kalampusan nga nakab-ot karon, magpabilin   lang gihapon siya nga mapaubsanon, ug niya pa hangtud karon pabilin pa ang iyang mga higala nga diha na siya kaniadto sa iyang kiliran sa  wala pa siya mulugwa sa local TV.

Giangkon ni Yuri nga tinuod nga na pressure siya niadtong mga panahon nga nagsungag na ang ilang mga show ni Jude apan nagpabilin ang pagsalig niya sa iyang kaugalingon.

Dako usab og interes si Yuri nga motrabaho sa mga charitable institutions ugaling mawala siya sa iyang trabaho sa local TV, gumikan kay  gusto gayud niya ang motabang sa iyang isigkatawo.

Yuri to Jude

Human sa turno ni Jude, si Yuri na usab ang mibawos og pangutana ngadto sa giilang “talk icon of Cebu.” Unang bungat ni Yuri mao ang pagpakisayod kun wala ba siya mingawa sa TV human usab siya mibiya sa iyang programang Jud Morning sa ABS-CBN Cebu.

“Honestly wala nako ma-miss ang pressure sa TV, na miss nako ang effect sa akong program, na miss nako ang mga kaayohan nga nahimo sa akong programa,” matinud-anong gahot pa ni Jud.

Dungan niini, gipahimuslan ni Jud ang pagpangayo og pasaylo ngadto sa tanan nga nagtamod niya, ilabi na sa “Jud Morning Girls” nga lunod patay misuporta kaniya, tungod kay wala siya makapanamilit og tarong ngadto nila.

Malipayon si Jud kay pinaagi sa iyang programa kaniadto daghan gayud ang nakakutlo og mga nindot nga ideya ang mga viewers, butang nga maoy hingpit niyang gikamingawan.

“Wala ko magpakita sa TV kay gusto ko mosikat. Nagpakita ko sa TV kay gusto nako ma-prove sa akong kaugalingon nga kaya nako,”tataw pa ni Jude.

Kumbinsido si Jude nga adunay direksyon ang tagsa-tagsa ka kinabuhi sa tawo ug dunay balidong rason sa matag kutay sa panghitabo.

Sa wala pa hingpit nga nahuman ang maong special presentation, nalakbitan ang paghisgot sa estado sa ilang kasingkasing.

Si Yuri mibutyag nga tua na sa langit ang iyang hinigugma sulod sa taas nga panahon, human kini maduhig sa usa ka bayolenteng panghitabo.

Apan nahugyaw ang tanan, dihang miingon usab si Jud nga wala siya’y uyab dungan sa pagkomedya sa rason luyo niining maong kamatuoran.

“Gwapa man unta ko, naay kuwarta hehe, mataha lang gyud sila nako,” nagkanayon siya.

Sa katapusan, subli niyang giklaro nga ang mga tawo lang ang sige’g lalis kabahin sa Kapamilya ug Kapuso; siya mipahibawo nga sila nga naa sa mga programa suod kaayo nga mga higala busa dili angay maglalis mahitungod sa kompetisyon.

* * *

Atangi dinhi nga pahina sa Banat Hugyaw ang detalye kanus-a ninyo silang duha maaninaw og balik sa telebisyon sanglit duna nay giluto karon nga pasundayag ang matag usa nila.

Paminaw sa OkRyan sa dyla 909 khz, matag alas tres hangtud sa alas kwatro sa hapon, Lunes ngadto sa Biyernes, alang sa labing lab-as ug walay lipod lipod nga pagtuki sa mga nag-unang isyu sa showbiz.