Moawit sa Cebu popular music festival

Kining nagpadaylang sa hulagway way lain kon dili si Miles kon Melecia Carciller, usa sa mga artista sa telestoryang nag-ulohan og “Prototaloy” sa channel 47, pero midaog sad ni siya sa Pop Sensation Showdown sa Oi! Show Nato Ni sa GMA-7 ug karon, permanente na gyod siyang co-host sa maong Sunday variety show. Busa, ato na lang siyang tawgon og “Lagare Queen,” kay mora’g siya ra maoy gitugotan sa Channel 47 ug sa GMA-7 nga mag gabas gabas gikan sa nataran sa Siete ngadto sa 47 and vice versa. Hawod siya, di ba? Gawas ana, mga manash, wa pa gyo’y hunong ang iyang pang raket sa uban pang mga live shows sa naagkalainlaing mga town piyesta. Hinoon, karon lang bag-o tingali, wa na siya tugoti sa GMA-7 ug sa CCTN –47, sa pagpang-raket sa ginagmay’ng mga sitio labi na’g pesos lang ang talent fee. O di ba, superstar na gyod si Miles Carciller? O, yess, mga manash, siya maoy napili ni Engr. Bernard Gocela, nga maoy mo-interpret sa composition niini para sa Cebu Popular Music Festival.

Mga manash, nahibawo ba mo nga kini’s Engr. Bernard Gocela katolo na modaog isip Best Composer sa CebuPop, ug ang iyang mga interpreters sila lang si Rakki {Rochelle] Vega, ug Sheryn Regis? Ang last ni Engr. Gocela mao ang “Banay” nga giawit ni Sheryn diin, ang “Banay” lang gihapo’y napiling Best Composition, ug si Sheryn maoy napiling Best Interpreter. Human ato, matod pang Engr. Gocela, wa na siya makakita og laing singer nga maoy mo-interpret sa iyang mga composition, busa nag-laylo una siya. Karon, naa na man sad si Miles Carciller, unsa may bout ipasabot ana? Nakita ni Engr. Gocela ang potential ni Miles? Matod pang Myles… “Ay! I’m just crossing my fingers and pray hard nga at least, moabot og runner-up ang kanta if not the best, bahala na’g dili ko mapiling best interpreter. Si Lord na lay bahala sa tanan…” 

Kamo mga manash? Motabang sad mo’g ampo sama nako? Friendship baya ni sila’s Engr. Gocela ug Miles nako. Pero puwede sad nga duna mo’y laing mga entries nga dapigan, okay ra na. Matod pa, all is fair in love and competition. CORRECT?