Padayong pagsulbong sa Vegadolls

Kagahapon inyong gisaw-an ang sinugdanan sa pagkamugna sa inanay na nga nagkadako nga ngalan sa grupong gitawag og Vegadolls sa Oi!  Show Nato Ni sa GMA-7. Naila-ila usab ninyo si Vegastar. Karon sinatia ang istorya sa tulo pa ka mga sakop sa grupo.

* * *

Jackson Pulvera a.k.a. Vega Boom nagdako sa San Francisco, Camotes, 18 years old ug nagtungha sa University of Cebu isip  2nd year sa kursong Hotel and Restaurant Management. Kining atong bida estorya sa anak nga nakigbisog para mabuhi ug makatabang sa inahan nga masakiton nga nipauli na sa ilang probinsiya. Bisan dili niya kagustuhan nga moundang sa pag-eskwela pero mao kini ang dakong desisyon nga iyang gibuhat. Ang pagkamasakiton sa iyang mama mao ang nagduso niya nga maninda   diha sa aseras. Bisan og ang kita dili ing-ana kadako pero para ni Vega Voom dako kining tabang sa iyang mama ug sa iyang kaugalingon nga mao karoy gisaligan niya sa inadlaw adlaw nga gastos. “ Okey raman nako kuya Yur, I’m proud of it” Bischika pa ni Vega Voom.

Wala niya kini gikauwaw nga permi siyang makit-an sa mga higala, classmates nga naninda og bisag unsa, gikan sa mga areyos, shades, kalo, bakus ug uban pa. Wala panumbalinga ang kainit sa panahon ug ang mga abog nga iyang gihimong higala. Dako ang iyang paglaum nga maabot ang adlaw nga kining tanang sakripisyo nga iyang gitanom iyang maani. Pagsalig sa Kahitas-an ang dako niyang puhunan nga dili makawat ni bisag kinsa man. Malipayon kaayo siya nga nasulod sa Vega Dolls kay dihang makit-an na siya sa telebisyon mas nidaghan pa ang iyang customer karon, ang uban nahimo pa niyang mga higala..

Vega Tron sa tinuod nga kinabuhi Apollo Degula, 17 years old, nagdako sa City of Promise—Davao City. Nakatikang siya diri sa Sugbu tungod sa dakong problema sa iyang mga ginikanan. Sakit man huna-hunaon nga ang iyang pagkatawo dili madawat sa iyang mga ginikanan wala kini gihimo niyang babag sa pagkab-ot sa iyang pangandoy. Ang pangandoy nga usa ka adlaw pagbalik unya niya sa iyang yutang natawhan mapasigarbo siya sa iyang mga ginikanan kung unsa man siya. “ Dili lalim kuya Yur ang akong panimpalad”, paambit ni Vega Tron.

Tiaw mo na mga Kabischika, sa wala pa siya nanimpalad diri sa Sugbu unang lugwa niya sa Manila nag-trabaho siya sa Sitcom comedy bar for eight months. Diri sa Sugbu nagtrabo siya sa usa ka spa  nga nahimutang sa Lilo-an. Pagkahuman sa iyang kontrata nakasulod napud siya sa usa ka sikat nga spa nga anaa mahimutang sa Mandaue . Wala siya nihunong  pagkat-on para mabuhi nga nag-inusara. Adunay mga panahon nga makahunahuna siya sa ilaha hilabi na  ang iyang pamilya , “Naghinaut na lamang siya nga usa ka adlaw sa iyang pagbalik sa ilang lugar sa Davao madawat na siya sa iyang mga ginikanan. “ Akong gitudluan ang akong kaugalingon Kuya Yur nga makaya ang tanan” niya pa.  Dako kaayo ang iyang kalipay nga nasulod siya sa Vega Dolls kay mas nadugangan ang iyang self confidence, dili maulaw sa pag-atubang sa mga kleyente , labaw sa tanan bisan sa mga nahitabo sa iyang kinabuhi wala siya gibiyaan sa Kahitas-an para atubangon ang mga pagsuway

Rosegene Clayde Salazar a.k. a. Vega May ang labing bata nga miyembro sa Vega Dolls from Ronda, Cebu. Sa edad nga 15 anyos nangandoy na sa paglugwa niya sa telebisyon makita niya ang iyang inahan nga sukad pa sa pagkabata wala niya ikauban. Tungod sa adunay laing pamilya ang iyang amahan, si Vega May nagpuyo sa iyang iyaan nga maoy nagtabang sa iyang pagtungha sa high school. Para masuklian niya ang kaayo nga gipakita sa iyang iyaan mutabang siya sa mga buluhaton sa balay. Pero kahibalo ba mo, para mapun-an ang iyang balon sa eskwelahan naghimo siya og paagi para makabayad sa iyang mga projects ? Maghimo siyag mga accessories, mamaligya pud og mga pulburon sa school ug uban pa. Hala noh? naay plano nga atbangan si Vega Boom sa pagka negosyante… hehehehe… “ Gimingaw ko sa akong mama Kuya Yur” matod pa ni Vega May. Mao nga nagkugi ko og maayo para maabot ang adlaw nga magkita mi sa akong mama ako nay mubuhi niya.”

Bisan sa mga nahitabo karon wala siyay gamay nga kalagot sa iyang mga ginikanan.Manghinaot lang siya pag abot sa adlaw nga matuman ang iyang pangandoy nga magkita silang tanan. Mao nga wala siya mag-usik sa panahon sa dihang nahibaw-an niya ang mahitungod sa audition sa Oi!, kay mao kini ang dugay na niyang gipangandoy nga mapakita ang iyang talento. Pagkakaron padayon niyang buhaton ang tanan para makahuman sa pag-eskwela para sa maayong kaugmaon.

Naglain -laing mga estorya sa tinuod nga kinabuhi sa atong mga bida matag Domingo, ang mga Vega Dolls. Ang mga tinuod nga mga dagway sa mga naglingaw nato matag Domingo luyo sa mga dagkong katawa matag usa kanila  nagmatuod nga ang tanang mga damgo sa kinabuhi dili lisod kab-uton kung adunay kakugi ug labaw sa tanan  pagsalig sa Kahitas-an.