December 8, 2007 | 12:00am
Sa usa ka panagtigom nga gipahigayon didto sa Marco Polo Hotel niadtong Nobiyembre 24 sa gabii, daghan ko’g nakitang kaila ug gikaistorya. Pipila kanila mga politiko, mga civic leaders mga abogado ug mga doktor. Duha kanila mao sila si Liloan Mayor Duke Frasco ug Mandaue City Mayor Jonas Cortes ug Board Member Weng Gakit. Daghan pa, pero kini lang sila maoy akong gihinganlan kay gawas nga may mahinungdanong hitabo mahurot pod ang tibuok page sa Banat Hugyaw kun iyawyaw nako ang tanang mga tawo nga akong kaila nga didto niadtong higayona nga wa raba gyo’y labot sa kalingawan.
Gihisgutan ni nako silang tulo, kay bisa’g mga politiko ni sila, sa pagpakig-istorya nako nila, ang mga butang nga among gihisgotan, may kalabutan man sa kalingawan. Una, si Liloan Mayor Duke Frasco nakahisgot man god nga usa sa among kauban sa gi-shooting namo diha sa Liloan, iya kunong ig-agaw, si Fernan “Marlon” Noval, ug matod niya, makakita kono siya panagsa sa among salida kun anaa siya sa balay kay manan-aw man kuno ang ilang mga helpers tungod lagi kay apil si Fernan kun Marlon. Gani, misaad si Mayor Frasco nga motabang unya siya namo kun magsaulog na kami sa among 2nd anniversary sa among salida sa umaabot Pebrero sunod tuig puhon. Na-flatter man god ko nga hasta diay ang ambongang mayor makakita sab diay sa among salida.
Wa pod nako damha nga nakaila nako si Mayor Cortes sa Mandaue City, kay wa man gyod mi magkahimamat pag-ayo niya personally, apan medyo nahibulong gyod ko sa dihang siya mismo ang miduol nako og nakig-istorya ug miingon nga gusto siyang mobisita ko niya sa iyang opisina, kay nasayod siya nga duna kuno ko’y ikatabang sa pipila ka mga proyekto niya. Na-flattered sab ko, labi na kay sa miaging eleksiyon, wa man gyod mi magka kauban ug mas daghang higayon nga nagkakauban mi sa iyang kaatbang nga si Jonkie Ouano. Sa dihang gisuginlan nako si Board Member Weng Gakit, ug gipangutana nako siya kun dili ba moggawas nga balimbing ko, giingnan ko niya nga angayang kalimtan ang politika kun gusto kong motabang ni bisan kinsa, labi na kun alang sa katawhan. Na, kun may pipila man ka tawo nga suod ni Jonkie Ouano nga makakita unya nako sa Mandaue City karong pipila ka adlaw, angayang hunahunaon nila ang gisulti ni Board Member Weng Gakit diri nako.
