Nabuyagan o gitiawan?
Tanang banda aduna gyu’y mga kasinatian nga dili malimtan. Naay makalingaw, makapasubo, dunay mahitungod sa kapakyasan, kalampusan ug uban pa.
Pero sa among banda WTF “What’s the Frequency?”
Oktubre 14 adlaw kadto nga Domingo sa alas 8:30 sa kagabhion samtang kami nagpaingon sa usa ka lungsod sa habagatan nga bahin sa Sugbu aron mupasundayag sa usa ka konsyerto kuyog ang mga bandang Assembly Language ug The Agadiers. Sa dihang nag-convoy kami padulong sa maong lugar, luwan sa tulo ka mga sakyanan, nag-una ang The Agadiers tungod kay sila ang labing nasuhito sa lugar; gisundan sa sakyanan sa Assembly Language ug kami maoy nauwahi.
Samtang nagbiyahe mibunok ang uwan nga gikaluhaan og pagpangilat diin ang dapit nahimutang sa bukiran nga bahin, ngitngit ug awaaw. Gamay ang kalsada, tungason ug liko-liko. Gumikan niini, lisod ang pagmaneho sa sakyanan.
Unya dihang mga duha ka kilometro na lamang ang gilay-on ug muabot na unta kami sa among destinasyon, unsa bang hitaboa nga mikalit man lang og kapawong ang makina sa among sakyanan? Tungod niini nahunong kami sa makadiyot, hinungdan usab nga nabuwag ug nabiyaan mi sa convoy.
Dihang miandar na ang among sakyanan wala mi maglangay, nagpabulhot mi og padagan sa pamasin nga maapsan pa namo ang convoy. Kadto mao ang hinungdan nga sa tantong paniguro namo og gukod, sayop nga eskina ang among nalikoan ug midiretso sa pangpang.
Ang ako ra jud mahinumduman nga nag-iyahay mi og shagit dayong lagapak ngadto sa ubos. Daw wala ko kasabot sa akong gibati; nagsagol ang kulba ug kabalaka dili para sa akong kaugalingon kundi alang sa akong mga bandmates.
Dako namong pasalamat sa Ginoo nga okay rami tanan; bisan gamay’ng pangos wala jud mi naka-angkon. Dako nalang pud namo nga pasalamat nga wala nakakuyog ang among bahista nga si Aiko Abelardo tungod kay layo ang lugar ug niadtong tungora nangandam siya alang sa iyang examination.
Ambot giunsa namo paggawas gikan sa natuwad nga sakyanan. Basta kay akong mahinumduman, dali ra nga nakatabang ang mga sakop sa Assembly Language ug The Agadiers. Ang makapahibong mao nga diha ra diay sila sa duol sa nahitaboan kay naghuwat sila namo ug gani nakakita pa sila og naunsa pagkatagak sa among sakyanan.
Magpasalamat pod mi sa mga habal-habal drivers nga maoy mitawag dayon og tabang sa labing duol nga baryo ug labi na sa mga tanod nga diha pod atong higayona.
Pero bisan sa nahitabo wala kini naka-balda namo sa paghatud sa musika sa Bisrock, kay sa nila pa, “ the Show must go on!!!” Bisrock n’ roll lang gihapon!!!!
- Latest
