Misfitz nga ni-fit sa ilang kalibutan

Halooo mga Kabischika! Ang   grupo nga akong ipaila-ila ninyo karon makaingon ko nga lahi sa uban kay kini sila adunay miyembro nga magsuon ug ang mga nagdumala sa maong grupo kay ang ilang Mama ug Papa.

Unsa man kaha ang rason nga nagdasig sa magtiayon aron dumalahon ang maong grupo? Sulod sa napulo ka tuig nagpabilin silang lig-on. Unsa kaha ang ilang sekreto? Mga suki, dali ug atong ila-ilahon ang grupo nga tungod sa pagsukod sa mga outfit nga dili angay o dili ma-fit nila, nahimugso ang grupo nga Misfitz!

Wala sa plano sa magtiayong Miraluna ug Nilo Nillas nga magmugna og dance group. Ang Bischika kay usa sa mga anak ni Tita Mira miyembro sa usa ka dance group kaniadto ug tungod kay dili pa makuha ang steps niini gitangtang siya sa grupo. Tungod sa nahitabo, naumol sa tuig 1997 ang Misfitz dancers nga adunay lima ka miyembro lakip na niini ang manag-igsoon nga si Adrian ug Raymund Nillas.

“Labad sa ulo usahay” paambit ni Tita Mira. Dili malikayan nga aduna gyud kini pasiaw everytime nga break sila during rehearsals kay all boys ang mga members niini. Pero kung aduna silay mga performance todo bigay gyud sila.

Kung pagkaHugyaw man ang hisgutan, usa sa mga miyembro sa Misfitz dancers nahimong usa sa mga sakop sa grupo nga gigikanan sa mga sikat nga artista nga anaa bug-at og papel sa nagkakusog nga teleseryeng “Marimar,” si Dino Gueverra ug si Sergio himself Dingdong Dantes nga mga original nga miyembro sa Abstract Dancers. Ug karon si  Gilbert Carabaña nga usa sa mga original member sa Misfitz ang nahimong miyembro sa Abstract. Sa iyang pagbalik gikan sa Manila iyang gipaambit ang iyang nahibaw-an ngadto sa Misfitz dancers para mas mahasa ang mga sakop niini sa natad sa sayaw. Tiaw mo na usa pa ka miyembro niini ang natagaan og higayon nga makasayaw sa Abstract dancers . Siya si Raymund nga usa ka child star sa pikas estasyon atong panahuna apan gipili ang pagsayaw ug pagtungha niadtong nag-edad pa kini og 14-anyos. Sama ni Gilbert pagbalik ni Raymund gikan sa Manila iya pud gipaambit ang iyang nahibaw-an ug sa pagkakaron siya na ang choreographer kauban ang iyang igsoon nga si Adrian nga maoy tigdisiplina sa mga miyembro nga pasaway.

Para sa magtiayon ang pagmugna sa grupo usa kini nila ka pamaagi ug tabang sa ilang komunidad nga mahilayo ang mga kabatan-onan sa ilang lugar sa mga bisyo.

Dili nila malimtan ang unang salang nila sa telebisyon sa tuig 1999 sa kanhing Singgit Cebu sa GMA- 7 diin para sa grupo dako ang natabang nga mas mailhan sila. Gani, dagkong mga kumpanya ang mokuha sa ilang serbisyo sa nagkadaiyang okasyon. Siyempre usa sila sa mga grupo nga mosayaw kung adunay mga shows ang GMA sama sa SOP, SOP Gigsters ug uban pa.

Para ni  Tita Mira para mamahimong usa ka Misfitz dancers kinahanglan adunay disiplina sa kaugalingon ug labaw sa tanan dunay paghigugma sa trabaho.  Kung ikaw usa ka pasaway, mag sigeg ka late ug labaw sa tanan magbitbit og babaye during rehearsals, pangandam nalang kay sure gyud kung mamutos ka. Hehehehe.

Para sa magtiayon malipayon sila bisan unsa ka busy nila sa ilang trabaho sa Regional Trial Court nga sulod sa napulo ka tuig nga ilang gidumala ang maong grupo nagpabilin silang lig-on; bisan unsa man nga mga pagsuway nga ilang naagian, sa matag miyembro nga nilakaw adunay niabot. Para nila usa kini ka hagit kay kung wala ang disiplina ug pagmahal sa trabaho dugay na silang nahanaw. Ang sayaw parte na gayud sa ilang kinabuhi nga ilang pwedeng ipasa sa sunod nga henerasyon.

Gikan sa Oi! Show Nato Ni! ug Bischika Banat Hugyaw, Congratulations Raymund Nillas, Adrian Nillas, Jeffrey Salado, Christian Aldamita, Mark Francis Cabilao, Glofir Lumayag, Junvie Lumayag, Niño Denge sa inyong napulo ka tuig sa pagsayaw  and of course saludo ko ni Tita Mira and Tito Nilo Nillas sa walay hunong nga suporta.

Para sa gustong mukuha sa ilang serbisyo ug gusto mahimong miyembro tawag lang sa numero 0920-6390799, pangitaa si Adrian o si Raymund.