Album sa Jr. Kilat molatas sa Enero

Una sa tanan mga pahasubo sa banay’ng Cabua sa barangay Tejero. Mitaliwan ang usa sa among editorial assistants nga si Aldrin Cabua niadtong nakalabay’ng semana gumikan sa balatian sa atay (liver).

Dugay na nga gisagubang ni Aldrin ang maong balatian apan tungod kay “jolly” man ang personality ni Aldrin maong nasaypan lang namo nga ordinaryong pagsakit sa kuto-kuto ang iyang gibati atol sa pagsaulog sa “Press Freedom Week” ning tuiga diha  sa Capitol Social Hall. Ang wala dayon niya mamatngoni mao nga 4th stage na diay ang iyang gisagubang nga liver cancer. Among panawagan nga mogahin kita’g pipila ka minuto sa pag-ampo alang sa kapahuwayang dayon sa kalag ni Aldrin. Vaya con Dios, Bro!

Niadtong nakalabay’ng gabii, nahinabi nako si Errol “Budoy” Marabiles, ang main man sa “Junior Kilat” nga labing nailhan sa ilang dub/reggae/reggaeton/rap music with Bisdak lyrics. Nahisgutan namo ni Budoy ang umaabot nga launching sa ilang ikaduhang album ug ang transisyon sa ilang istilo gikan sa dub ngadto na’s chill ug electronic music. Gihikay na karon ang mga materyales alang sa dili momenos 10 tracks diin duha niini mga kanta ni anhing Roman “Yoyoy” Villame, isip tribute nila sa mitaliwan nang Boholano novelty singer. Aduna sila’y version sa “ Granada ” ug “Magellan”.

Ang paglusad himoon sa Enero, matud pa ni Budoy. Hayan nga i-atol ang maong paglusad sa Sinulog celebration. Gipaubos pa sa usa ka negosasyon kun asa himoon ang maong paglusad ug ang tukmang takna. Gipasalig ni Budoy nga ang preview sa album anhi gyod pagahimoon sa Sugbu una kini iapod-apod sa tibook nasud. Gani, karon pa lang aduna nay line-up si Budoy sa mga radio stations nga ilang hatagan og mga samplers aron manganaw-kanaw na ang pipila ka kanta sa dili pa ang launching niini.

Gihulagway ni Budoy nga “less lyrics and more on the playup of instruments” ang ilang mga gipangmugna karon nga mga materyales. Ug gibalikan nila ang usa ka ugat sa mga nakaimpluwensya sa paglambo sa ilang musika. Kini mao ang tribal music. Ang ilang ikaduhang album aduna’y sampling sa mga musika sa mga tribu nga susama sa B’laan (South Cotabato) ug Hanunuo (Mangyan) sa Mindoro.

Ang ikaduhang album, nga wala pa’y definite nga titulo, ubos sa Galaxy Records ug mapalit puhon sa mga nanag-unang record bars dinhi sa Sugbu. Nagkanayon si Budoy nga gawas sa kalamposan sa ilang “Party Pipol Ur on Dub TV” album ug sa pagdaug sa “Ako Si M16” isip Song of the Year sa NU107 Rock Awards (2005), nalipay kaayo siya nga ang Junior Kilat nominado sab sa usa ka website (wala niya hinganli) isip usa sa Top 10 Indie Bands sa nasod ug nga giisip nila nga labing dakong kalamposan ang ilang pasundayag isip front act ni David Nesta “Ziggy” Marley (anak ni Jamaican reggae icon Bob Marley) sa kaulohan Marso ning tuiga.

Gawas sa atong pag-atang sa bag-ong album sa Junior Kilat, atangan usab nato ang mga kalamboan karon nga napili na ang hulip ni Rico Blanco isip frontman sa Rivermaya. Si Jayson Fernandez, 18, nga nagdako sa Manguisoc, Camarines Norte apan nanimuyo na karon sa Laguna maoy gipili nilang Lizza Nakpil (manager sa Rivermaya), Louie Talan (bahista sa Razorback), ug Francis Reyes (The Dawn; influential music director sa NU107) nga i-puli kang Rico human sa duha ka buwan nga search nga nag-ulohan og “Rivermaya: Bagong Liwanag” nga gipahigayon didto sa Music Museum. Gani, nakauban na ni Jayson silang Mike Elgar, Mark Escueta ug Japs Sergio sa “Oktoberfest Finale” ug Studio 23 gig sa Iloilo.

Naguol kaayo ko nga gitalikdan na ni Rico ang Rivermaya tungod kay alang nako siya gyod ang “utok, kinabuhi ug kalag” sa maong pundok nga usa sa mga pioneering Pinoy alternative rock bands sa dekada 90 bisan pa man og si Francisco “Bamboo” Mañalac maoy nagtukod niini. Pinaagi sa iyang musicality, sentimentality ug creativity, natandog gyod ni Rico ang akong “kasingkarol” pinaagi sa kantang iyang gitagik. Naanod ang akong emosyon labi na gyod sa kantang “Imbecillesque” nga kabahin sa usa ka FREE album nga giapod-apod niadtong sayong bahin sa Milenyo. Hinuon, may mga hungihong nga dili totally motalikod si Rico sa kalibotan sa entertainment. Mo-embark kuno ang atong aydol sa usa ka solo career.

* * * Greetings * * *

Hapi beerday to my sister, Nonelee “Nanette” Elape Valeros of USJR-Grade School Basak Campus, belated hapi beerday to my mama Rose (November 10), ug advance hapi beerday sa akong papa Vic (November 28). Ug mo-greet kong daan sa tanang Oponganons alang sa ilang tinuig nga kasaulogan sa pangilin sa Birhen sa Regla.