Oiran sa Japan, courtesan sa Europa, kisaeng sa Korea

Maihap lang ang mga Koreanovela nga nakapatandog kanako sukad kining matang sa teleserye gihangop dinhi sa ato. Usa na niini ang bag-o pa lang nasugdang “Hwang Jini” sa GMA-7.

Trahedya ang maong Koreanovela tungod kay dili man magkadayon si Hwang Jini (Ha Ji Won) ug ang iyang first love nga si Kim Eun Ho (pagkagwapo ra ba ni Jang Geun Suk, dili katuhoan nga 20 na diay siya, ug nindot ra ba unta ang ilang “chemistry” ni Ha Ji Won).

 Apan kun nganong minunot gyod ko pagtan-aw sa nagkanindot na niining mga “episodes” mao nga nanumbalik sa akong handurawan ang mga sugilanon sa mga courtesan sa Europa ug oiran sa Japan tungod kay ang kapalaran sa mga courtesan ug oiran mao man sab ang gilatid alang sa mga kisaeng/gisaeng sa 16th century Korea, atol sa Joseon Era.

Giisip ang mga kisaeng nga mga ubos nga matang sa mga maglilingaw (mananayaw, musikera, ug magbabalak). Mao usab kini ang nahitabo sa mga courtesan sa Italya. Kahinumdoman nga si Catherine McCormack isip si Veronica Franco sa lilas nga “The Honest Courtesan” (1996) mitalikod sa iyang gugma alang sa usa ka lalaki aron mamahimong courtesan sa Venice niadtong ika-16 siglo.

 Siguro kun may panahon nga “bad time and bad place to be a poor woman”, mao na kining mga panahona ug lokasyon. Ang mga babayeng gikan sa banay nga pobre gimandoan nga mosumite sa ilang kaugalingon ngadto sa tanang institusyon sa katilingban; makigminyo lamang sa lalaki nga gipili sa ilang mga pamilya ug ang kasagarang konsiderasyon niini mao ang kwarta. Finance dili romance, pung pa. Ug labaw sa tanan, gidid-an sila sa pagdiskubre sa ilang sekswalidad ug pagkab-ot og edukasyon. Gani, kadaghanan kanila sa wala pa mahimong courtesan dili maantigong mobasa.

Matawag man nato nga “ironic”, apan ang mga courtesan bisan sa ilang pagbaligya sa ilang unod, adunay kahigayonan nga makat-on sa history, geography, literature, social graces, ug uban pa, aron maantigo silang makigkukabildo sa mga intelektwal nga sakop sa hataas nga hut-ong sa katilingban, mga noblemen, mga dagkong tawo sa gobiyerno, mga bisitang langyaw labi na gyod ang mga representante sa nagkalainlaing embahada.

Ang mga natandog sa “Hwang Jini” tingali makaingon nga nahisama ang mga kisaeng sa geisha sa Japan. Basi sa akong pagpanuki-duki, mas haom nga pagaingnon nga nahisama sila sa oiran. Ang geisha nagsugod lamang isip “performers”. Samtang ang oiran, nga nahauna kanila, mao ang “pay-per-night” girls. Hinoon, sa pagligid sa panahon ug tungod na sab sa “economic reasons”, nahatod ang mga geisha ngadto na sa pagbaligya sa ilang dignidad, susama sa atong nasaksihan sa “Memoirs of a Geisha” (2005) nga gibitoonan nilang Zhang Ziyi ug Gong Li.

Balik sa Hwang Jini, natala siya sa kasaysayan sa Korea nga labing gibantog nga kisaeng tungod kay dili lamang siya makamao mosayaw, maantigo usab siyang mobarog sa iyang katungod bisan pa man og wala gyo’y klarong biling gihatag alang sa susama kanila nga matang sa kababayen-an niadtong panahona tungod sa ubos ug yano nilang estado sa katilingban.

Dinhi sa ato, daghan og mga kasakit ang kababayen-an labi na gyod sa nakalabay’ng duha ka siglo. Nahigot sa bana, bata ug balay, pipila lang ang naedukar ug may klaro ug disenteng pangita. Biktima sa pang-abuso labi na gyod pang-abusong sekswal. Ang uban biktima mismo sa mga kabanay.

Dinhi sa ato, giisip nga ang usa ka babayeng nagbaligya sa iyang dungog angayan na lang gyod nga isalibay. Ug bisan pa’g makamao siya mangatubang sa mga dagkong tawo susama sa mga politiko o lain pang sakop sa mga ahensya sa gobiyerno, trapo ang tan-aw ug binaboy ang pagtratar kaniya; mga pangantalita ug pagyubit ihapos diha sa iyang lawas nga naguhay-guhay na’s kauwawan ug kalag nga naglunang na sa yanang.

Nahinangop ko’s susama ni Hwang Jini nga maantigo mangatarongan, nakahibalo nga ang pagpakahanas sa arte ug siyensa wala’y bili kun wala’y gamit ang kasingkasing. Bisan pa man sa indoktrinasyon nga dili sila angayan nga bugtian sa pagmahal sa usa ka lalaki, nakahibalo si Jini nga ang kasingkasing lamang ang makagiya kun unsa ang angayang mga lakang aron ang iyang kailhanan isip babaye nga nahimugso sa sabakan ni Buddha mosangpot ngadto sa usa ka katilingbanong kabaghoan.