Molabyug hangtud dunay musika

Halllooo mga Kabischika! Ma-imagine ba nimo ang imong kaugalingon kung mag edad naka og 60-anyos  pero kusog pa ka molabyug? Kaya ba nimo nga musol-ob og mga sexy attire nga poised gihapon? 

Siyempre kining tanan kaya kaayo sa usa ka grupo nga ang pipila ka mga miyembro aduna nay  walo ka anak, napulo ka apo ug labaw sa tanan suportado sa ilang mga kapikas sa kinabuhi.  MakiHugyaw kauban sa atong mga Goldies ‘N Goodies!

Nagsugod kining grupoha sa tapok-tapok sa mga mag-amiga ug para mawala ang kalaay gipaagi og labyog-labyug sa hawak isip usa ka exercise hangtud nahimo na kining usa ka sayaw.  Nagsugod sa tuig 2000 ang Goldies ‘N Goodies  gipanguluhan ni Fe Villareal o mas nailhan nga Tita Fe.   Imagine sa edad nga tres anyos nagpakitang gilas na kini sa natad sa pagsayaw.  Dili niya malimtan ang sayaw nga boogie kay mao man kini matang sa sayaw nga una niyang nakat-onan. Mas nabaid pa ang iyang craft sa pagsayaw kay gi-enroll siya sa iyang mga ginikanan sa San Diego Dance Company. Aktibo kaayo si Tita Fe sa mga school activities sa eskwelahan sa dihang nagtungha pa siya. Pero karon matud pa niya, “Suportado nami karon sa among mga bana ug anak.”  

Sa nagsugod pa sila adunay mga miyembro nga ang ilang bana o anak magyawyaw kay dugay sila mauli sa ilang mga balay tungod sa mga rehearsal. Pero ang tanan nilang kahago nasuklian kini og pagpasigarbo na, sa ilang mga minahal sa kinabuhi sa ilang unang sayaw sa entablado nga todo bigay kaayo.

Hinay-hinay nailhan ang Goldies ‘N Goodies gani nakatikang na pud sila sa mga lain-laing lugar sama sa Bohol, Leyte ug sa uban pang dapit sa probinsiya sa Sugbu para magperform. Sa miaging buwan gidapit sila sa SM City Cebu para mag perform sa “Elderly Week “ ug pwerteng Hugyawa sa mga nakasaksi niini ug gani adunay niduol nila para imbitahon sa usa ka okasyon.

Sama sa kanta nga gipasikat sa Bisrock band, Aggressive Audio nga giuluhan og “Senior Citizen” ang Goldies ‘N Goodies, “bisag kabus maningkamot mobarog aron molabyug!” Kini gilangkuban nila ni Fe Villareal, Linda Ungria, Cresencia Indab, Susana Campo, Crotilde Cavan, Carmen Selnsontic, Infanta Sevilla ug Dulce Casinyas, kinsa determinado nga  molabyug hangtud aduna pa’y musika…

Para sa mga gusto mokuha sa serbisyo sa Goldies ‘N Goodies kontaka lang si Tita Fe sa numero 412-2879.