Mga gradwado sa seminar

Wa ko’y kailang migradwar karong buwan sa Oktubre [matod pa nila mga Octoberian], pero daghan ko’g mga higala nga migradwar sa tolo ka adlaw’ng stay in Catholic Life In The Spirit Seminar nga didto ipahigayon sa Echo Tech Center sa Sudlon, Lahug sa miaging Oktubre 18-19 ug ang graduation sa Oktubre 20. Ang mga higala nakong migradwar naglakip nilang Freddie Madarang kanhi usa ka Visayan movie producer –[usa sa naproduce niyang movie mao ang “Alyana” starring Leila Rosales, Larry Abelgas, Marina Sales Villanueva ug Mabert Impas. , former KBP chairman Manny de los Santos Rabacal nga karon anchorman sa Balita Karon sa CCTN, ug mga artista nga sila si Lorte Cabrera, Pinky Jomao-as ug Mat Abaincia, Jr.

Si Manny nga konektado pud sa Department of Tourism sa Lapulapu City, nahimo pud nga manager sa dyMF Bombo Radyo sa wa pa siya mobalhin sa CCTN. Sa iyang pagka manager sa Bombo Radyo, nakapahimo siya sa maong estasyon nga number two sa survey ug nahimo usab siyang chairman sa KBP. Sa wa pa siya sa Bombo Radyo usa siya sa gitawag og The Big Four sa dyDY [gipuli sa DYAB-ABS-CBN sa dihang gipasirado pag-martial law ang ABS-CBN ] nga naglangkob nila ni Lee Boholst Kintanar , anhing Larry Abelgas, Eddie Abellana ug anhing Roger Solante. Usa ko sa mga writers sa mga drama sa maong estasyon.

Si Pinky Jomao-as usa ka bag-ong artista ug naa siya sa telestoryang “Saksi Ang Mga Bitoon sa Langit” samtang kini si Lorte Cabrera maoy alang nako, original nga Sto. Nino, kay wa pa’y Sinulog kaniadto sa bata pa siya, siya ang gipadala sa papel ni Sto. Nino sa Visayan movie :Ang Mga Milagro Ni Senior Sto. Nino”  Kauban sila ni Pinky sa “Saksi ang Mga Bitoon sa Langit’

 Si Mat Abaincia, Jr. ilado kaayo sa natad sa entablado ug ubay ubay na usab og naapilang mga teleseries. Sa pagka karon siya si Father Jun sa “Tres Metros” apan matod pa niya, lahi na gyod kono kaayo ang role niya sa Season 4. Sa dili madugay, taposon na ang season 3 sa naasoy nga teleseries.