‘Saranghe,’ Choi Jin Wook

Sa labing unang higayon sa kasaysayan sa Cebuanovela nga gipauso sa ABS-CBN Regional Network Group, usa ka langyaw ang molugwa sa lokal nga telebisyon isip usa sa mga bida.  Siya si Choi Jin Wook or Keric, kisa sugod karong adlawa ilhon ug hangpon sa mga Bisaya  isip si Jim, sa lain napud nga istorya sa gugma, “Saranghe.”

Pahiluna na ug atong saw-an ang istorya ni Keric kinsa ni sa damgo lang wala mangandoy nga mamahimong artista. Unom ka buwan ang milabay, bag-ong abot lamang siya dinhi sa Sugbu isip kabahin sa nagkadaghang mga Korean nga motaak dinhi sa dakbayan matag karon ug unya aron magtuon sa pinulungang English. Igo lamang siyang gidala sa iyang magtutudlo sa ganghaan sa ABS-CBN diha sa Jagobiao, nga niadtong higayona usab kapila na mag-ilis-ilis og artista nga mohaom sa papel sa usa ka Korean nga usa sa mga importanteng role sa ‘Saranghe.” Gani asoy pa ni Ms. Donna Ocampo, RNG Production Head, mitaak na sila sa Davao ug uban pang dakbayan sa Visayas ug Mindanao aron pagpangita gayud nianang binuhat nga ilang gipangita. Ang ilang giduso nga profile sa Manila, puros gibasura, walay mahika, walay ‘dating.”

Apan pagsulod pa lang sa 21-anyos nga si Choi Jin Wook sa production office sa ABS-CBN, nabatyagan nga siya na ang ilang gipangita. Ug pagpunting na sa mga lente sa camera ngadto ni Choi: Voila, “siya na talaga!” matud pa. Busa pilay istroya, siya maoy nakaangkon sa papel nga Keric, ang Korean nga mibiya sa ilang nasud tungod kay nakonsensya siya nga nagpakamatay ang iyang uyab dihang iyang gibuwagan. Pag-abot niya sa Sugbu, nagpaila siya nga naggikan sa ordinaryo lamang nga pamilya bisan og tinuod naggikan siya sa multi millionaire nga kaliwat. Dinhi magkurus ang ilang dalan sa tindera og buwadnga si Louie, (Gryka Alberto Barrientos), kansang “kababata” nga si Jonathan (Jay Justiniana), usa ka taxi driver dunay gitago nga pagbati nga labaw pa sa panaghigala, para sa dalaga.

Ania ang diretsong mga tubag ni Keric sa nagkadaiyang pangutana nga gibato kaniya sa mga sakop sa E-Group (Entertainment Group) atol sa presscon niadtong Sabado sa hapon.

E-Group: Duna ba siya’y uyab nga gibiyaan sa Korea?

Keric: No. We broke up last year. (Wala, nagbuwag mi sa milabay nga tuig)

E-Group: Duna ba siya’y gipangulitawhan dinhi? Unsay iyang tan-aw sa mga Cebuana?

Keric: No. Cebuanas are very kind ( Wala. Buotan ang mga Cebuana)

E-Group: Inig sugod og salida niining “Saranghe,” dili malikayan nga dunay mga bayot nga maibog niya tungod sa iyang ka gwapo, (6’2 ang gitas-on ni Keric ug kada adlaw mag-gym ug magpabilin didto sulod sa tulo ka oras), unsay iyang bation niini?

Keric: I’m available. I’m open minded (Okay lang walay problema. Bukas ang akong hunahuna sa mga ingon ana)

E-Group: Kinsay imong crush sa showbiz?

Keric: Kim Chiu.

E-Group: Unsay paborito nimo nga pagkaon nga gama sa Sugbu?

Keric: Humba, ngoyong. I drink tablea, it’s chocolate. 

E-Group: Moinom ba ka og ilimnong makahubog?

Keric:  I drink Tanduay and San Miguel Beer. SanMig is very expensive in Korea, I did not know it is from the Philippines. (Moinom ko og Tanduay ug SanMig, mahal kaayo sa Korea, wa ko kahibaw gikan diay ni sa Pilipinas)

E-Group: Motan-aw ba ka og mga salida sa TV?

Keric: I watch ‘Wowowee and Deal or No Deal.

E-Group: Kung mosikat ka og maayo dinhi pareha ni Sandara Park, mopauli ba gihapon ka sa Korea?

Keric: He,he, he. I will stay. (Marine Engineering ang kurso ni Keric sa Korea; gusto niya nga mamahimong seaman)

E-Group: Unsay kinabuhi nimo sa Korea?

Keric: I’m a student in Korea. My hobby is diving. My younger brother is popular in Korea because he is a wrestler. He is into Judo and he plans to join the Olympics (Sikat ang iyang 15-anyos nga manghod lalaki sa Korea kay daghan og nadaog nga competition sa wrestling ug martial arts; nagplano nga moapil sa Olympics)

E-Group: Batbata ang pulong ‘Saranghe” sa Bisaya..

Keric: Gihigugma ko ikaw.