Manny, inisnab ng mga sports official

Nang magkasunod na magbigay ng state­ment ang aktres na si Jean Garcia at ang mga opisyal ng bayan sa Surigao na kapwa nagsasabing wala na­mang masamang nang­yari talaga sa aktres nang dumalaw siya sa lalawigan, hindi namatay ang mga is­pe­kulasyon kundi lalo pang lumubha ang mga usapan.

Nakiusap pa si Jean sa movie press na kung maaari ay huwag na sanang mapag-usapan pa ang bagay na iyon, na wala na­mang nangyaring hindi maganda sa kanya, at natutuwa siyang naka­balik na rin siya sa Maynila. Ayaw na ni Jean pahabain pa ang kuwento.

Ang mga opisyal din naman ng Surigao ay nagsabing sa pagkaka­alam nila ay maayos ang naging pamama­lagi ni Jean sa kanilang lugar, at pinakisama­han naman siya ng maayos doon ng lahat ng mga tao.

Walang ‘maltreat­ment’ sabi nila.

Ang hindi lang mali­wanag sa amin ay kung bakit sinasabing nang magbalik si Jean sa Maynila ay umiiyak siya nang dumating sa airport, may escort pang dalawang pulis at ni hindi makapagbigay ng kahit na anong statement. Hindi rin naman maliwanag sa amin ang kanyang statement na natutuwa siyang nakabalik na siya sa Maynila na walang nangyaring masama.

Basta kasi sinabi mong natutuwa ka at nakabalik ka, ibig sabi­hin noon ay nagkaroon ng peligrong hindi ka makabalik. Kung sasa­bihin mong natutuwa ka at nakauwi ka nang muli, ibig sabihin noon may naging problema sa pinuntahan mo. Mararamdaman mong may nangyari ngang hindi maganda, ayaw  lamang niyang aminin.

* *  *

Napansin lang na­min, nang dumating si Manny Pacquiao, hindi mga opisyal ng sports ang sumalu­bong sa kanya kundi mga talunang pulitiko at ang secretary of Environment and Na­tural Resources, isang departamento ng gob­yerno na wala namang kinalaman sa boxing.

Doon naman sa Channel 7, ang suma­lubong sa kanya ay mga artista, wala man lang mga athletes na bumati sa kanya.

* *  *

Tuwang-tuwa si Fr. Dale Anthony Bar­retto Ko, ang parish priest ng Proposed National Shrine for St. Padre Pio sa Santo Tomas, Batangas, da­hil iyong mga bricks na inalis sa Rizal Avenue sa Maynila, matapos na iutos ni Mayor Fred Lim na muling buksan ang lansangang iyon sa traffic ay ipinag­kaloob pala ng mabait sa mayor para maga­mit sa itinatayong shrine ni Santo Padre Pio.

Nasabi nga sa amin ni Fr. Dale na ipina­panalangin naman nila na sana ay lalong maging matagumpay ang pa­mumuno ni Mayor Lim sa Maynila. Ang mga deboto ni Padre Pio sa buong bansa ay nag­papa­salamat din kay Mayor Fred Lim.