Saranghe ugma na gyud!

Human sa mga upat ka buwan nga pag-usab-usab sa script ug sakop sa cast, sa katapusan mulugwa na sa lokal nga telebisyon  ang labing bag-ong Cebuanovela sa ABS-CBN, ang “Saranghe,” Korean word nga nagpasabot og “I love you.”

 Kung ang gisundan niini nga proyekto, ang “Summer Sunshine” mitekang gyud og Hongkong alang sa pipila ka mga eksena, ang usa sa mga bida sa ‘Saranghe” Koreano gyud ug ang pipila ka eksena naturalmente, adto sa Korea pud gam-on. Pwes, maisip nga ang ‘Saranghe” ang labing ambisyoso nga proyekto sa tanang Cebuanovela nga namugna sa ABS-CBN Regional Network Group.

Bida niining maong proyekto sila Gryka Alberto Barrientos isip Louie, tindera og buwad sa Taboan Public Market; Jay Justiniani sa bandang Cueshe, taxi driver nga si Jonathan kinsa childhood friend ni Louie, ug ang Korean student nga mao si Choi Jin Wook or Keric isip si Jim.

Ang istorya mao ni: si Louie ug Jonathan suod nga managhigala sukad pa sa ilang pagkabata; si Jonathan dunay gitago nga pagbati ngadto sa dalaga, apan inig sulod sa eksena ni Jim masakitan si Jonathan ug matugkad niya nga labaw pa sa suod nga higala ang iyang gibati ngadto ni Louie. Pwes, kinsay magkadayon sa katapusan? Kini maoy angay atangan tungod kay magdepende ang ending niini sa paghangop unya sa publiko.

Kini ang proyekto nga giluto para gyud unta ni Jay-R Siaboc, apan gitino ni Ms. Donna Ocampo, Production Head sa RNG nga ang schedule gyud ni Jay-R maoy nakaingon. Gidugang hinuon niya nga kasagaran sa nahibilin sa cast, dili maoy una nilang nahunahunaan.

Dungan niini, ang bokalista nga si Jay nagdumili gyud pagbutayag pilay talent fee nga iyang nadawat nga nagtukmod niya aron himoon ang maong proyekto bisan pa man sa kadaghan usab og commitments sa Cueshe sa kaulohan. Miuyon hinoon siya sa pamahayag ni Ocampo nga “it’s a good deal.” Gibutyag pud ni Jay nga dili kini una niyang higayon nga molugwa sa lokal nga telebisyon tungod kay kaniadto sa wala pa modako og maayo ang pangan sa Cueshe, daan na siya nga mi-arte alang sa For Life ug co-host usab sa Sabado Na Gyud, mga shows sa ABS-CBN Cebu.

Playing safe ang iyang tubag dihang gipangutana kinsay iyang inspirasyon—pamilya. Apan dihang gipiit, miingon siya nga si Gryka tungod kay maayo kaayo kining mo-arte busa inspirado usab siya nga motrabaho. Pero matud niya, wala gyud siya’y uyab pagkakaron kay trabaho ang iyang priority.

Samtang si Gryka miangkon nga minyo na siya, apan walay angay kabalak-an ang iyang bana bisan pa man og puros ambongan ang iyang mga leading men. Sugilon niya nga dihang iyang gipahibawo ang iyang bana nga tua magtrabaho sa Manila, giingnan siya niini nga padayon kay duna siya’y “trust” niya.

Ang ‘Saranghe” mulugwa na sa inyong lokal nga telebisyon ugmang adlawa, 10:00-10:30 sa buntag alang sa pilot episode ug sa Martes, 3:45-4:15 na kini maaninaw, hangtud na sa paghuman niini karong Disyembre sa dili pa ang pasko.

Kini mugna sa hunahuna ni Jurey Mirafuentes, kinsa mao usay direktor kauban si  Beling Rodriguez.  

Atangi ugma dinhi sa Banat Hugyaw kay atong ila-ilahon og maayo si Choi Jin Wook or Keric