Shaina, masama ang loob kay Vina dahil ikinwento sila ni John sa press!

Tuwang-tuwa na nga­yon si Jennylyn Mer­cado dahil may TV projects na siya sa GMA-7.

Nagkaroon na ng storycon na siya ang title role,ang La Vendetta last Friday at ang lead­ing man niya ay si Mark Herras.

Ito sana ‘yung Pata­yin Sa Sindak Si Bar­bara pero nakuha na ng ABS-CBN ang TV rights kaya’t iniba na lang ng Siete ang titulo at base sa tsikang nakuha na­min ay pinatay si Jenny­lyn kaya’t nagmumulto siya para paghigantihan ang lahat ng may sala sa kanya.

Kasama rin si Jenny­lyn sa Joaquin Bor­dado ni Robin Padilla kasama uli si Mark.

Bukod dito ay tapos na ang 3rd album ni Jen na may dueto sila ni Janno Gibbs under GMA Records na may titulong “How Do I Live.”

Pinaghahandaan na rin ni Jennylyn ang con­cert niya sa Zirkoh Ti­mog this November 24 with guests, Janno, Nyoy Volante, Valerie Concepcion, Jay-R Siaboc at surprise guests na produced ng manager niyang si Becky Aguila.

* * *

May permiso pala si Olyn Meimban kina Matt Evans at Melissa Ricks na maging sweet para mas lalong tangga­pin ang loveteam nila para sa Pedro Pen­duko At  Ang Mga Eng­kantao at ang Hairy Harry episode ng Love Spell.

Aware pala si Olyn sa mga pinagsasabi ng dalawa sa press launch ng Love Spell at walang kaso sa kanya, “Ako pa nga po ang nag­sabing dapat maging sweet sila para mas maganda.

“Usapan na po na­min ni Matt ‘yun, Tita Reggee kaya hindi ako nagseselos,” ito ang masayang tinig ni Olyn nang makausap namin.

‘Yun nga lang, hindi napapanood ni Olyn ang dalawang programa nina Matt at Melissa dahil bisi-bisihan siya sa pangangampanya sa lugar nila sa Toro Hills, Quezon City dahil kandi­dato siya for SK.

* * *

Nasa second season na ang Maka­bayang Duktor nina Drs. Willie at Liza Ong na napapanood sa RPN 9 tuwing Biyernes sa ganap na 4:30-5:00pm.

Maganda ang layunin ng mag-asa­wang Willie at Liza para makatulong sa mga nangangailangan kaya lang hindi sila gaanong napapansin sa RPN 9 dahil ang mga viewer ngayon ay tila dalawang TV network lang ang alam, ang Dos at Siete.

Gayunpaman, umaasa ang mag-asawang duktor na sana mapansin ang programa nila para naman mas ma­ra­mi na rin silang sponsor tulad ng Goldi­locks, STI at CS.

Mahigit isang milyon daw ang nagagastos ng programang Makaba­yang Duktor every month kaya’t nahihilo rin ang mag-asawang Ong kung saan at paano nila hahagilapin ang nasabing halaga buwan-buwan.

Nadulas na rin si Dr. Willie na nag­karoon sila ng pagtatalo ng kanyang ama at kailan lang nagkasundo dahil naubos daw nito ang ibinigay na pera sa kanya.

Para sa libreng serbisyo ng Maka­bayang Duktor ay maari silang pun­tahan sa Room 401 ng Manila Doctors Hospital, United Nations, Manila sa araw ng Lunes hanggang Huwebes sa ganap na 12NN til 3PM o maaring tumawag sa 524-30-11 local 4190.

* * *

Gaano katotoo na sumama raw ang loob ni Shaina Magdayao sa kanyang ate Vina Morales dahil sa pagku­kuwento nito na nagpupunta si John Prats sa bahay nila sa North Susana Height, Quezon City?

Sa nakaraang Supah Dance album launching ay nabanggit ng ate ng batang aktres na nakikita niyang du­madalaw sa bahay nila si John at nabanggit din na kung saan masaya ang kapatid niya ay doon siya as long as alam nitong i-handle ang sarili.

Hindi kasi nakarating sina John at Shaina sa nasabing launching kaya’t hindi nila naipagtanggol ang kanilang mga sarili.  – REGGEE BONOAN