Ug mibalik siya

Sa paghinapos sa tuig 2006, gipangita kining usa ka versatile ug may pagka ambongan [medyo mimenos ang pagka ambongan sa paglapas niya sa kalendaryo] nga artista sa entablado ug telebisyon nga gihinganlan og Mat Abaincia, Jr., pero naila sa ngan Jun Abaincia. Kini kay taodtaod man siyang nawaa sa sirkulasyon ug gikinahanglan kaayo siya ni Tess Diez alang sa usa ka proyekto sa telebisyon, kay matod pa ni Tess, ang role kono, moha-om gyod kaniya, ug gikinahanglang makita una siya, una sila mangita og ikapuli aron unya ma-adjust pa ang role alang sa ipuli.

Namantala siya dinhi sa Banat News, ug paglabay sa tulo ka adlaw, mitawag ang iyang igsoon nga nag-alagad diay sa air condition maintainance sa Ayala ug nangutana og nganong “WANTED” man ang iyang manghod, hinungdan nga sa laktod nga pagka sulti, “NAPALGAN” pag-usab si Jun Abaincia. Pwes siya gyod ang nakadala sa usa ka mahinungdanong papel sa proyekto nga niadtong higayona matod pa, alang gyod kaniya. Human niadto, nawaa na pod siya, apan wa mawaa ang numero sa iyang cellphone busa, gi-contact na sad siya ni direk Pepe Tariman alang sa usa ka mahinungdanon na usab nga role sa gihimo ni direk Tariman alang sa Cebu Catholic Television Network. Ligdong ug boutan, apan walay gikalisangan nga pari ang iyang role karon sa “Tres Metros” apan matod pa niya, giingnan na siya ni direk nga angayang atangan sa mga televiewers nga mga suki sa CCTN, ang bag-o niyang role sa Season 4 sa mao gihapong salida kay lahi na usab ang iyang role nga sukwahi gyod kono kaayo sa iyang role karon. “Pila na lang ka semana, mahuman na ang Season 3 sa “Tres Metros” ug mosugod na usab ang Season 4. Matod ni Jun, gikatakda kono silang moadto sa Chocolate Hills, sa Baclayon, sa Loboc River ug sa mga beaches sa Panglao sa lalawigan sa Bohol alang sa unang tulo ka semanang mga establishing shots ug pipila ka mga action scenes sa Season 4 sa maong salida. Giangkon ni Jun nga nadani pod kono siya sa politika busa mitabang siya sa kandidatura ni karon, Compostela Mayor Richie Wagas aron makapaniid siya kun unsay angayang buhaton sa higayon nga andam na siyang mosagubang sa laing panid sa iyang kinabuhi.