Rakrakan bisa’g bunok ang uwan

Mo-congratulate ko’s Vimcontu management likod sa dyLA – ang pinakalig-on ug sinaligang media organization sa dakbayan gumikan kay nadayon gihapon ang “Bisrock Rakrakan” niadtong Huwebes, Septiyembre 27 diha sa ALU Compound sa Pier 1 bisan pa man sa hulga sa panahon.

Salamat sa mga sponsors nga naagni’ng mopaluyo sa kawsa ug sa tanang naminaw sa Smash ug dyLA kay hooked up live man kadto sa kahanginan.

Last year, mao sab ang nahitabo. Naglain ang panahon. Hinuon mas grabe tong sa nakalabay’ng tuig kay bagyong Milenyo gyod ang mihulga. Mao sigurong wa gyod mabangbang ang management ning tuiga kay proven na nga astig kini kay misukol gani’g bagyo last year. Pasalamat ko’s tanang mihugop niadtong gabhiona. Bisan tinoora og wala gihapon masugdi ang maong konsiyerto basi sa unsa’y nasabotang takna, malamposon ra man gihapon nga natapos ang pasundayag sa wala pa motuktuga-ok ang manok. Ug bisan pa man kun ang nakalangay mao gihapong mga sakop sa bandang wa pa diha (attitude na pod mo ha?) ug pipila ka mga tawong gigamhan gihapon sa kainit sa ulo maskin nibunok ang uwan, nakontrolar gihapon ang “show”.   

Matag karon ug unya managan intawon ang mga spectators labi na’g dagko na kaayo ang lusok sa uwan. Nya kun moaksyon og tu-ang mobalik na sab, ang uban nagpatibasa na lang. Samtang diha’y nanagpayong nga nag-ikid-ikid gihapon bisan sa kakamig sa panahon. Diri ra ko’s second floor sa building sa ALU nagpa-antaw sa entablado kun kinsa ang motikang ug unsa pa’y ubang mga kalamboan nga mahitabo niadtong gabhiona. Tigmi kaayo sa gawas, ug bisan og day-off nako niadtong adlawa, misungasong pod ko’s uwan kay may katuyoan man kitang buot tubagon in the line of duty, BANAT NEWS being a partner of dyLA 909kHz – Tingog sa Mamumuo ug 93.1 Smash FM – Cebu’s Rock Fortress and Home of the Bisrockers.

Hinoon, wala nay bag-o niadtong gabhiona tungod kay gawas sa Senex nga gikan pa’s Bohol , naandan na man ang mga performers nga ana-a sa lineup. Sama sa Aggressive Audio, Indephums, What’s The Frequency?, Fervent, Gangrene, Circle of Willis, Assembly Language, Agipo, Glass of Dirt nga aduna’y komposisyong nag-ulohan og “Tingog sa Mamumuo”, Wet Slipperz, Agadiers, Retdem, Timeslot ug Kabobo. Ang bag-ong putahe lang siguro nga nasilbi niadtong gabhiona sa talad sa Bisrock scene mao ang mga bag-ong kanta sa mga banda ilabi na gyod kadtong may mga entries sa “Nasod Ko (12 Little Things For Our Country)” album nga giprodyus sa Dilaab Foundation, Inc./Dilaab Movement sama sa “Simbahan” sa Aggressive Audio, “Barusa” sa Indephums, “SONA” sa What’s The Frequency, “Smuggled Goods” sa Assembly Language, “Resibo” sa Agipo, “Hugno” sa Glass of Dirt, “Sunda’ng Balaud Ta” sa Fervent, ug uban pa.

In fairness, nindot kaayo ang Sound Balloon nga maoy sound system gigamit niadtong gabhiona. For the first time (sa tanang concert sa dyLA ug Smash), mirehistro ra gyod og “clear and crisp output” ginamit ang ekipo sa Sound Balloon. Klaro kaayo ang angay sa mga instrumentong gipanggamit, ingon man ang mga vocalists ug makabungog ang output sa tingog sa mga hosts. Pero kun kanus-a nindot ang sound system mao po’y pagka-half-baked sa performances sa ubang mga Bisrock artists. Masabtan nga siguro gipangkuray sa katugnaw ang mga natungdan. Sama pananglit sa Circle of Willis nga semplang ang timplada sa ilang vocalist. Naunsa ba to uy? Idungag sad ang Assembly Language nga mora man og gipangtugnaw nga piso. Ako pa ninyo, dili na lang mo motungtong sa entablado kun half-baked ang inyong performances. Kay maklaro gyod bisan unsaon pa ninyo’g project nga rockers ug astig mo. Makaikog sa mga tawo nga nangadto bisan naglain ang panahon, namasin nga makasaksi ninyo at “your very best”. Gawas nga nagdali, wala gyo’y kinabuhi ang performance. Naunsa ba sad tong imbis bug-at man ta ning Glass of Dirt kay lagi metalheads, nabug-atan sad ang mga sampot sa mga nanan-aw, hapit na lang sad mangyaka mora’g gipanglaay? Ug bisan pa’g gi-motivate sa vocalist nga si Loloy Amante ang mga tawo, nanaghukdong naman lang? Unlike last year nga bisan pa’g nagdala’g huros sa hangin ang panahon, wa gyod mangapalid ang mga audience sa ilang pagheadbang, body slam ug stagedive. Ayaw ko pag-ingna nga nihunob na ninyo ang kakamig?

Newayz, kitakits puhon sa anniversary rakrakan alang sa ikaduhang tuig sa “BisrocKabataan”. Matud pa ni DJ Ram Dizon, tulo na gyod unta kuno ka tuig ang kawsa apan wala na lang niya kwentaha pa ang panahon nga adto pa sa Casbah sa Ayala magtukaran ang mga Bisrock artists. Panahon pa kuno kadto sa research works, panahon nga naghuwat pa’s pagbukal sa kasibot alang sa Bisrock Movement. Ang giihap ang moduha ka tuig nga tulumanon sa radyo nga kanhi iyang gidumala with Bré Ambungan Abrea. Ang mga detalye niini pagahisgotan karong buwana sa programa. Tune in gihapon mo 10 am to noontime para di maiwit sa mga detalye. Sa Nobiyembre ang selebrasyon. Hinaut pa unta nga bisan og wala’y talent fee, maningkamot gihapon ang mga banda nga makahatag og de-kalidad nga pasundayag. Ug kun wala na’y panahon magpraktis dili nalang patuga-tuga og katkat sa entablado kay haw-ang gihapon. Hilaw ang templada bisan pa’g unsao’g kuskos sa gitara ug siyaok sa bokalista. Maypa’g ihatag ninyo ang kahigayonan sa ubang mga banda nga andam ug tagana’ng mohatod og de-kalibreng matang sa kalingawan.