Gikuninitan si Pacman

Naisnab jud nako ang lavish birthday celebration sa gwapang former Looc Barangay Captain ug karon Mandaue City councilor Inday Edith Flores Cabahug nga gisaulog atong Sunday, September 16, kay gipalabi nako ang pamilya ni anhing Danny “back to base” Espinosa Relatado., bisa’g wa gyod unta ko’y planong mang-isnab sa iyang birthday. Pero unsaon mang kinahanglan mang moduyog pod ko sa kasaulogan sa death anniversary ni anhing Danny , kay wa na may laing giisip nga parent ang magsoong mga anak niya nga sila si Mrs. Filma R. Usselton [US- based], Buddy M. Relatado, Mrs. Rowena R. Ontina, Danny Relatado, Jr., ug Marilou M. Relatado . Gitingob na lang gani nila ang death anniversary pod sa ilang late mother nga si anhing Fe Maarat Relatado, ug birthday pod ni Marilou, ug ni Madame Annabelle Ricaplaza Montecalvo, kay panagsa ra pod intawon silang magkatigom. Nahimo ganing whole day affair, naabtan pag gabii, mao nga bisa’g nag-ingon si Inday Edith Flores Cabahug nga gabii pa ang iyang birthday celebration, wa na gyod ko makatunga, kay naagnas na gyod intawon ang senior citizen ug aging gay writer.

Gikan gani ko sa 9:00 am mass sa chapel sa broadcast center sa Cebu Catholic Television Network [CCTN], nagdali ko’g pauli para makaapas sa KMK [by the way, we need more KMK vehicles, don’t you think so?] nga moagi sa akong malapalasyong tahanan paingon sa Minglanilla diin, adto  magtapok ang tanang kaparyentihan sa mansion ni Inday Filma Usselton, busa wa ko ka join ni Sister Nancy Mirafuentes [ang biyuda ni anhing Yoyoy Mirafuentes, ang original nga singer sa kantang “Prototaloy”] sa iyang programa, diin si Manny Pacquiao maoy iyang guest.

Yes, mga manash, didto sa chapel sa broadcast center sa Cebu Catholic Television Network mosimba si Pacman, ug puwerteng luhod luhod niya daw kinasingkasing na gyod ang iyang pag-ampo before sa iyang interview with Sister Nancy. Gani, dugay kaayong nakagawas si Pacman sa chapel kay gikuninitan ug gikagubtan man siya sa mga nanimba nga bout manguha’g hulagway niya kauban ni Wakee Salud. Hasta ang mga adunahang mga lay ministers niapil gyod sa pagkuha sa iyang hulagway, timaan lang nga bisa’g sulod sa balay sa Diyos, moandar gyod ang pagka BIG FAN sa katawhan sa usa ka tawo nga nakahatag og dungog sa nasod.