Kontrata alang sa follow-up movie, pirmado na

Wala pay figures nga giluwatan, apan gihulagway nga “mega blockbuster” ang pelikula nila ni Kim  Chiu ug Gerald Anderson sa pagbukas niini sa mga sinehan lukop nasud niadtong Miyerkules.

Tsika nga nadawat sa Banat Hugyaw kagahapon gikan sa kasaligan tinubdan nga suod nila ni Kim ug Gerald nagkanayon nga gumikan sa kalampusan sa maong proyekto, gipapirma na dayon ang maong mga young stars og kontrata niadtong Miyerkules sa hapon alang sa ilang follow-up project ubos sa Star Cinema.

“Mega blockbuster ang movie nina Kim at Gerald. Napaiyak si Kim sa tuwa,” nagkanayon ang mensahe nga nadawat sa Banat Hugyaw kagahapon sa udto.

Gibutyag pud sa tinubdan nga dunay umaabot nga episode sa LoveSpell sila si Kim ug Gerald nga hayan isalida na sa unang Domingo sa Oktubre.

Gikatahong apil sa maong episode si John Uy, finalist sa Be Bench Model Search ug giingong constant date karon ni Ara Mina. Si John giingong miangkon atol sa story conference sa maong episode nga crush niya si Kim kaniadto pa.

Samtang dugang tsika sa tinubdan mao nga sugdan na ang taping alang sa soap nila ni Gerald ug Kim karong Nobiyembre ug adto kini himoon sa nasud sa Japan.