D’Abyss: Sayaw gikan sa kinahidlaman

Haloo mga Kabischika!  Maayong adlaw diha kanimo!  As requested sa atong mga suki dinhi sa Banat Hugyaw nga ipatik ang ilang paboritong mga dance group, sa walay pagduha-duha ang inyong Kabischikador nihimamat gyud dayon sa Choreographer/Manager sa grupo nga ang pasabot sa pangan niini kay “depth of the ocean”.  Dali ug pahimutang usa kay ato silang ila-ilahon hangtud sa kinalawman – ang D’Abyss Dancers!

Si Abigail o mas nailhan nga Abby ang Choreographer/Manager sa grupo.  Usa siya ka miyembro sa una sa grupong San Diego Dancers sa dihang nagtungha pa kini sa college sa University of San Jose-Recoletos ug miyembro pud sa Adelante DanceTroupe.  Dili na kita mahibulong nga sa pagligid sa panahon human siya mi-graduate ug mi-trabaho sa usa ka dakong kumpanya wala mapapas ang dakong gugma niya sa pagsayaw.  Mao nga nahimugso ang grupong D’ Abyss sa tuig 2004.  Ug take note, puros sila babaye.

Dili malimtan sa grupo nga ang una nilang TV exposure natigayon sa Singgit Cebu ug gikan niadto wala ug tuo na ang mga nikuha nila alang sa nagkadaiyang pasundayag. ”Dili man ana kasayon Yur ang magtukod og grupo,” sugilanon pa ni Abby.  Isip Manager iyaha tanan gikan sa pagkaon during rehearsals, pamilete, make-up ug costumes.  Dili malikayan nga adunay mga “pasaway” nga miyembro ug bisan supak sa iyang kabubut-on human nga kini matagaan og warning, wala siyay choice kun dili iya gyud kining tangtangon kung mosupak sa gipatuman nga patakaran sa ilang grupo.

Ingon nila kung adunay molakaw aduna usay maabot. Pwes, nanganak ang D’Abyss, ug nadungagan na sila og mga lalake nga maoy mohimo sa mga acrobatic and stunts sa ilang mga performance. Layshu! Apan walay hunong si Abby sa pag-atubang sa mga pagsuway sa ilang grupo diin para kaniya mao kini ang naghatag og katakos para mas molambo ang usa ka grupo. Tiaw mo na? Bisan asa na sila nanglayat para mag-perform sa mga probinsiya ug bisan sa tabok sa dagat tungod sa gihatag nga salig sa mga kumpaniya nga nikuha kanila. Take note, adunay mga higayon nga gikuha sila mag-perform for free para makatabang sa usa ka proyekto, ug alang ni Abby, ”Nindot ang feeling Yur nga makatabang ka.”  Bisan asa musayaw sila mapabarangay man, adunay fiesta o bisag unsa nga mga kalihukan kay para nila mao kini ang usa sa ilang marketing strategy para mas daghan pa ang makaila kanila.

Sulod sa tulo ka tuig, diin man kuhaa ni Abby ang powers niya? Well, in every woman’s success daw there’s a man behind.  Sa maong sitwasyon, ang iyang kapikas sa kinabuhi nga si Mark Juepre Padilla maoy iyang katimbang sa pagduma sa ilang grupo. Pinaagi sa iyang love of my life dungan nila nga mas gipalambo ang maong grupo.  Asa ka ana?  Tungod sa sayaw nakaplagan ni Abby si Mark ug  tungod sa sayaw kauban ang iyang anak nga si Aby Mae Padilla gilangkat nila ang titulo sa usa ka nasudnong indigay,  “Lady’s Choice Real Love Mom and Kid Talent Showdown”, usa ka pa-contest sa Manila nga giapilan sa Luzon, Visayas ug Mindanao. Wala damha ni Abby nga sa maong indigay sa a-mother-and-child contest sila ang makadaug. 

Mapasalamaton kaayo siya sa tanang suporta nga gihatag sa mga Sugbuanon. Dinhi niya nakaplagan ang sumusunod sa iyang trono nga si Aby Mae ang unica hija ni Abby nga unom palang katuig maayo na kaayo mo emote and project ug molabyog basta sayaw ang hisgutan. Go girl!

Para ni Abby dako na kaayo ang iyang kalipay nga makita ang usa sa iyang mga miyembro nga nagpakita usab og potensiyal sa pag-choreograph. Pagkakaron busy ang magtiayon og tudlo o choreograph sa mga tunghaan hilabi na panahon karon sa mga Intramural ug dili gyud masipyat matag Summer adunay ipahigayon nga workshop si Abigail Padilla.

Iyang pahinapos nga Bischika para sa tanan niyang mga miyembro sa D’Abbys Dancers na silang Darell Christine Encila, Sherilyn Casul, RC Gabutan, Darryl Mill Digal, Leonore Cantivos, Ann Po, Janeth Rebarbas, Chong Canasa, Rona Pineda, Jason Aniñon, Junard Garcia,Kim Bantilan, Cherry Ann Garcia, Kring-Kring Almeda, CatherineAlmeda,Gilda Pepito, Junce Ponce, Vanissa Villamor, Renard Cosino, Phoebe Blancas, Jasmin Tripoli ug Marrieane Abarquez mao lang kini ...”Be proud to be D’Abyss Dancers” . . . Layshu! Mahilig mosayaw, naay disiplina ug maayong pamatasan mao kini ang mga kalidad ang mga gipangita ni Abby para sa gusto mamahimong D’Abyss dancers.

Para sa gustong mukuha sa serbisyo sa D’Abyss dancers contact Ms. Abigail Padilla pinaagi sa 09228092076 0r 09228199716.