Marian cover girl sa Manual

Si Marian Rivera, ang Pinay Marimar, maoy cover girl sa Manual magazine alang sa October issue niini. Sa mga hulagway nga gipakita kagabii sa 24 Oras, wala kaayo magpakita og “skin” ang dalaga, apan depensa sa editor-in-chief sa maong mens magazine nga wala kinahanglana nga maghubo aron lang ipalutaw nga sexy ang usa ka babaye.

Gisaad hinuon ni Marian nga dili kini maoy una ug katapusang higayon nga magpa-sexy siya sa cover sa usa ka men’s magazine, sigurado siya nga masundan pa gyud kini apan pag-abot sa tukmang panahon.

Green Paradise ni Christine, mahinayon

Mahinayon na ang sexy movie ni Christine Reyes, ang Green Paradise. Apan dili na kini maoy mamahimo niyang launching movie, tungod kay sa balita sa 24 Oras kagabii, gikatahong nakigtagbo na ang kampo sa dalaga kang Mother Lily Monteverde.

Pwes dako ang posibilidad nga ang Regal Films maoy mulusad ni Christine isip sexy star.

Kahinumduman nga una nang nabalita dinhi sa Banat Hugyaw nga dili na mohinayon si Christine sa Green Paradise tungod kay wala siya makauyon sa pasiunang output, kay matud pa niya labihan ka maot sa pagkakuha sa iyang mga importanteng eksena, hinungdan nga moatras na siya kay dili siya buot mauwawan.

Apan matud ni Christine kagabii sa 24 Oras nga nagka-istorya na sila sa producer ug nagkasinabot nga solusyonan ang iyang mga reklamo. Gipasaligan pud siya nga dili na si Ben Santos ang direktor. Matud ni Christine ang orihinal gyud nga direktor niya nga maggikan sa Hongkong ang gitakda nga muabot sa nasud aron maoy mohimo sa Green Paradise.

Ken Zhu, maghimog pelikula; Jennylyn ang pares?

Muabot sa Pilipinas karong September 28 ang usa sa mga sakop sa sikat nga Taiwanese boy band nga si F4, si Ken Zhu. Kahinumduman nga labihan ka sikat sa maong grupo dinhi sa Pilipinas pinaagi sa drama series nga Meteor Garden, gani kasamtangan kining gisalida og balik sa GMA-7 pagkakaron.

Ang ubang miyembro sa F4 mao sila si Jerry Yan, Vaness Wu, ug Vic Zhou.

Gikatahong ang pag-abot ni Ken may kalabutan sa shooting sa Batanes: Sa Dulo Ng Walang Hanggan. Hangtud pa siya sa tunga-tungang bahin sa Oktubre magpabilin dinhi sa Pilipinas alang sa maong pelikula, diin turista ang iyang role nga na-inlove og maayo sa Batanes.

Nasayran nga ang Ignite Film ang producer sa pelikula ug ubos kini sa direksyon ni Adolf Alix, Jr., kinsa maoy direktor sa Donsol ug Kadin nga sa  Batanes pud gihimo.

Dunay mga taho nga si Jennylyn Mercado ang giingong leading lady ni Ken sa maong digital film, apan dunay miingon nga nagpadayon pa ang negosasyon tali sa kampo sa young actress busa dili pa pinal ang tanan.

Giingong duna pay laing Kapuso star nga nahunahunaan alang sa maong role.

Hinuon ang original choice gyud mao si Judy Ann Santos apan gibalibaran kini sa aktres tungod sa ka busy sa iyang schedule.

Dingdong out na sa Dagao

Dili na mahinayon si Dingdong Dantes sa GMA Films, Dagao diin makauban unta niya for the first time si Richard Gutierrez sa direksyon ni Chito Rono.

Ang tsika sa PEP kagabii, ang hectic schedule ni Dingdong  sa Marimar maoy hinungdan nganong kinahanglan niya nga balibaran ang maong horror movie.

Dugang tsika mao nga gitanyag ngadto ni Diether Ocampo ang maong project, apan mibalibad ang nahisgutan tungod kay wala siya tuguti sa Star Cinema.

Ang latest mao nga si Ryan Agoncillo na maoy gitanyagan, apan iyang giklaro nga wala pa gyud siya hingpit nga mitando tungod kay wala pa siya makabasa sa script ug wala pa siya makapananghid sa Star Cinema.

Hinuon matud pa niya, atol sa presscon sa My Kuya’s Wedding, nga kun dawaton niya ang Dagao, dili ra sila magkaproblema tungod kay ang shooting nila ni Judy Ann  Santos para sa Sakal, Sakali, Saklolo, sequel sa malampuson nga Kasal, Kasali, Kasalo, October pa sugdan.

Gawas pa gipasaligan siya ni direk Chito nga humanon nila ang Dagao sulod sa 15 days, sa Camarines Sur ang ilang shooting. – Ryan Mark