Malampusong embahador sa mga awit nga Binisaya
Ang pagkatawo ni Vir Diacuma, kun atong tan-awon
Tungod sa iyang pagmahal sa mga awit nga Binisaya, sa iyang dakung tinguha sa pagpabanhaw sa daw nahikalimtan na lang nga walay kamatayon nga mga awit nga sinulat nila ni Vicente Rubi, Ben Zubiri, Minggoy Lopez ug uban pang bantug nga komposer nga Bisaya. Aron sa katumanan sa iyang paninguha sa pagbuhi sa kanunay sa mga awit nga atong pinulongan, siya nagpasakop sa pundok sa mga mag-aawit ubos ni anhing Ramonito del Rosario. Sa pundok niini gitawag og dyRC Haranista Club, kaniadtong 1980 hangtod sa tuig 1986.
Dihang nainutil na sa pag-atake sa iyang sakit, siya gihangyo ni del Rosario nga maoy mopadayon sa iyang pundok paglingaw sa mga katawhan pinaagi sa kahanginan. Tuod man sa pagtaliwan ni del Rosario sa laing kalibutan siya maoy mipuli sa gitahas niini nga pagpadayon sa gisugdan nga tulomanon sa radyo.
Ang ngalan sa pundok ni anhing Ramonito del Rosario nga dyRC Haranista Club, iyang giilisan og “Haranahan Ko Ikaw” diin siya mao na ang pangulo ug program host. Iyang gitudlo isip opisyales sa iyang pundok sila si Pepe Talbog, puli-pamuno; Adeline Talam, kalihim; Bernie del Carmen, auditor; Henry Reyes, account executive ug Cebu City Councilor Edgar Labella, legal adviser.
Ang pundok sa mga mag-aawit ni Diacuma human makaalagad og unom ka buwan diha sa estasyon sa DYAB, mibalhin ngadto sa Phil-radio dyRB ubos na kini sa bag-ong ngalan sa ilang pundok nga “Mga Haranista sa dyRB.” Ang ilang programa mabati sa kahanginan kada Sabado sa gabii gikan sa alas 7 ngadto sa alas 8 sa gabii. Kini gipaminaw kaayo sa mga mahigugmaon kaayo sa mga karaan ug bag-ong mga Binisaya nga awit.
Ang iyang mga sakop nga mag-aawit sa “Haranista sa DYRB” naglakip sa mga inila nga mga mag-aawit kaniadto hangtod karon sila si Armistice Abayan, Bernie del Carmen, Adelina Talam, Fe Rivera, Pepe Dabon, Mely Flores, Aiding Sancol, Nene Bastatas, Angeling Yburan, Francing Leones, Lito Dedicatoria, Vir Villafuente, Frank Llanes ug si Max Sabikil ang gitarista sa pundok. Pipila sa iyang sakop nga mag-aawit nga mitaliwan na sa kalibutan mao sila si Momoy Sabikil, Piux Gutierrez ug Nestor Taneo.
Si Vir Diacuma ang gitawag ug naila na kaayo nga embahador ug tigpalambo sa mga awit nga Binisaya nga gipalanog sa kahanginan. Malampuson siya sa iyang pagpaninguha sa pagbanhaw sa mga nabantog nga mga alawiton nga Binisaya, nga hapit na mawala sa sirkulasyon sa natad sa kalingawan kun kultura nga Sugboanon. Ang iyang pundok sa mga mag-aawit nakaalagad na og 27 ka tuig sa iyang tulomanon pinaagi sa kahanginan hangtod karon.
Si Vir Diacuma lumad nga taga barangay Talamban, dakbayan sa Sugbu. Naminyo siya kang Luth Mayol nga taga Talamban usab ug gitugahan sila og duruha ka mga anak nga lalake.
- Latest
