Metal Invasion

Karong Agosto 17, sunod Biyernes puhon, idalit kanato sa Purple Revenge Entertainment ang usa ka “bug-at nga rakrakan” nga nag-ulohan og “Metal Invasion” nga anha ipahigayon sa Zzubu Rock Bar sa Mabini corner Colon Street ning dakbayan.

Gitapok nilang Chona Gamboa, presidente sa Purple  Revenge; Talisay rapper Naw-T-Dog sa local hip-hop group Königs isip marketing officer; Toopsy Racal sa bandang Black Star isip adviser; ug ni Khah Eslao ang emcee atol sa “Metal Invasion” ang siyam sa mga kinakusgang metal bands sa Sugbu aron ihatod ang usa ka matang sa kalingawan nga siguradong motay-og sa atong tagsa-tagsa ka kalibotan isip magdadayeg sa musikang rock.

Mag-abot ang 40 Diaz, PostMortem, Persona, Stallions of the Burning Church, The Childz, Black Star, Zzubu, Forgotten Knights ug Blacksmith alas-otso sa gabii sa Agosto 17. May pakaping libreng drinks ang P60 nga balor sa entrance. Ug may ipahigayong raffle sa event t-shirt nianang gabhiona.

Nagsugod sa pagpanokar ang PostMortem niadtong Oktobre 1998 isip four-piece metal band. Orihinal ang ilang line-up nga gilangkoban nilang Jason Rosales sa vocals, Jon Vistal sa guitars, Toff Garcia sa bass, ug Jonas Go sa drums. Na-record nila ang ilang first single nga nag-ulohan og “Slayer’s Day” sa tuig 2002. Nakadawat ang maong kanta og “regular airplay” sa NU107, pinaagi sa tulumanong “In the Raw”. Band influences nila ang old school heavy metal o ang late 70s ug 80s hangtod sayong bahin sa 90s nga mga metal bands. Trip nilang ipabati ang paningog nga daw sa naglagubong dalugdog ug nagbahihing mga kabayong nanagdagan.

Samtang impluwensya sa Blacksmith ang mga beteranong bandang Metallica, Megadeth, Motorhead, Wolfgang, Black Sabbath ug Pantera. Naporma ang Blacksmith pinaagi ni Rowel Banaay, vox, ug Ruell Magpayo nga schoolmates sa ilang college years. Human makatapos sa ilang pagtoon sa kolehiyo, nakahukom sila nga magtukod og banda. Nagsugod sila pagpangita og drummer ug bass player hinungdan nga gipostada nila ang usa ka panawagan sa usa ka Internet forum. Sa 2006, nahingpit ang banda ug nahimo nilang first gig ang “Kasadja” niadtong Disyembre 7. Sa kasamtangan, gipanghingusgan sa pundok nga padayong manglipang ang “heavy metal movement” dinhi sa dakbayan.

Kinsa ba ang wala makaila ni makadungog may kabahin ang “Stallions of the Burning Church ” nga usa ka progressive metal band nga naka-base sa dakbayan sa Mandaue? Silang Michael Gumagay sa vocals, Edmund Ramas sa bass, Dave Gonzales sa guitar, Zach Escobedo sa keyboard, ug Tonton Juguan sa drums mao ang mga Stallions.

Nahimugso ang Stallions sa tunga-tungang bahin sa 2005, sa dihang ilang nasuta ang ilang “passion for metal music”. Sa sinugdanan, focused lang ang banda sa pagtokar og metal cover songs hangtod nga ilang nahukman nga mosulay sa pagsuwat og kaugalingong kanta. 
Kasamtangang adunay duha ka kanta ang Stallions. Kini mao ang “Duel with the Devil” ug “Within Striking Distance” nga nanganaw-kanaw na sa Y101 FM ug Monster Radio.

Masaligon kaayo ang Stallions nga mapalambo pa ang ilang mga talento gumikan kay ila namang nasulayan ang ilang katakos pinaagi sa pagdaog sa nagkalain-laing band competitions. Pinaagi sa ilang premyo, nahinay-hinayan nila pagtrabaho ang release puhon sa ilang full-length debut album nga nag-ulohan og “Consumed by Vengeance”. Kinakusgan nilang impluwensya ang Dream Theater ug Symphony X.

Duha ang Black Star sa Sugbu. Ang usa ka banda world/ethno/tribal music ang tirada. Apan kining Black Star nga naka-base sa Talisay metal ug classic rock ang gipalanog. Naglangkob sa Black Star silang Dimebag Zamora (lead guitarist), Hubert Abalo (bass guitarist), Zaldy Bacasmas (vocalist), ug Toopsy Racal (drummer). Nanagtigom ang upat niadtong Pebrero 2005. Ang mga sakop sa Black Star kabahin usab sa usa ka church choir. Gipalanog sa Black Star ang “metal and progressive style of music” pagpalabang sa mensahe nga ang musika usa ka paagi sa “self-expression” ug aron makakab-ot og “peace and harmony between nature and mankind”. Buot nilang ipamahin ang ilang musika aron makatukod og mga lig-ong panaghinigalaay labi na gyod sa mga bag-ong henerasyon sa mga music artists.

Orihinal nga komposisyon sa Black Star ang “ Dato Mo , Pobre Ko” nga nanganaw-kanaw na karon sa 93.1 Smash FM.

Lakip sa mopasundayag karong Agosto 17 ang 40 Diaz (epic/black metal). Buot usab ipalanog sa 40 Diaz ang “blackest and purest black metal sound” pinaagi sa pag-cover sa mga kanta sa Behemoth. Kasamtangan nilang gisulat ang orihinal nilang komposisyon ginamit ang istilong black metal nga nag-ulohan og “Cardinal of Sin”. Lain pang mga impluwensya nila ang mga foreign bands nga Black Sabbath, Iron Maiden, Judas Priest, Dimmu Borsir, Therion ug Ozzy Osbourne.

Samtang ang Persona (death metal/metal) gilangkoban nilang Andre Fernandez sa vocals, John Villaver sa drums, Lloyd Bacus sa guitars, Arvy Rina sa guitars, ug John Tallo sa bass. Nagsugod pagpasundayag ang Persona niadtong Nobiyembre 2005. Nakatokar na usab sila live sa Talisay City Complex, Boss Grill, La Mer ug Dumlog Grounds. Ilang mga idolo ang mga bandang Pantera, Soul Fly, Lamb of God, Trivium, Killswitch Engaged, Devil Driver, God Forbid, Abortion ug Sepultura.

Kabahin usab sa “Metal Invasion” ang The Childz (metal/progressive rock/alternative band) nga diin si Kristoffer Dinauto ang bokalista, Concord Fabillar ang drummer, Mark Larisma ang bassist ug Ryan Deiparine ang gitarista. Nagsugod ang maong banda kaniadtong Septiyembre 2006. Ilang inspirasyon ang mga foreign rock acts nga 311, Nickelback, Switchfoot, Dishwalla, Metallica, After Bridge ug Creed.

Samtang gilangkoban nilang Jerome Ortega sa vocals, Robert Navarro sa guitars, Kimo Oriol sa guitars, Ryan Cadungog sa bass ug Aibe Panulde sa drums ang Forgotten Knights (hard rock/heavy metal). Sa awahing bahin sa dekada 90 natukod ang bandang Forgotten Knights. Sa mosunod nga mga katuigan ilang gisaw-an ang impluwensya sa musika gikan pa’s ulahing bahin sa dekada 60 hangtod na’s bag-ong panahon – gikan sa musika ni Judas Priest ngadto sa Raphsody. Matud pa, from rock to symphonic metal genre ang ilang tirada. Sa tuig 2002, misugod sila pag-cover og mainstream music. Sa tuig 2005, natibook ra gyod ang perfect line-up sa grupo. Ang lima ka mga sakop nahimong lima ka kabalyero sa Forgotten Knights. Lain pa nilang impluwensya ang AC/DC, Black Sabbath, Iron Maiden, Manowar, Megadeth, Firehouse, Kiss, Skidrow, Ugle Kid Joe, Twisted Sister, Savatage, Hammerfall, Blind Guardian, ug Dragonforce.

Ang “Metal Invasion” idalit usab kanato sa Bite Magazine ug Killer Bee. Alang sa skedyul sa mga gigs, suroy sa www.cebumetal.co.nr.