Labing dakong hagit ni direk Joyce

“Mahirap palang magdirek ng aso,” nagkatawang pag-angkon ni direk Joyce Bernal ngadto sa entertainment press.

Kasamtangang gihimo karon ni direk Joyce ang Pinoy version sa Mexican telenovela nga “Marimar” diin dili lamang mga artista, pinanguluhan nila ni Marian Rivera ug Dingdong Dantes, ang iyang idirek kundi lakip na pud ang talking dog nga si Fulgoso, si Nigel, ang Golden Retriever nga orange ang color sa baga nga balahibo niini.

Tsika ni direk Joyce lupig ang artista sa talent fee ni Nigel tungod kay gawas nga dunay trainor, duna pa kini yaya nga kauban sa set, ug duna kini kaugalingong sakyanan.

Tsika pa ni direk Joyce, sa sinugdanan sa taping naglisud sila tungod kay dili maminaw ang iro sa tawag nga “Fulgoso” busa iyang gipasidan-an ang tanang tawo sa set nga wa nay motawag niini og Nigel kun dili Fulgoso na gyud.

Gikinahanglan nga bansayon ang iro nga kauban si Marian isip Marimar, ug bisan pa og trained na kini dunay mga higayon nga makawrasan gihapon ang dalaga.

Dili pud pwede nga diretso nga mag-taping tungod kay kinahanglang pakan-on ug pakatugon una kini. Ang tingog ni Michael V maoy gamiton nga tingog ni Fulgoso.

Magsugod na ang “Marimar” sa August 20, hulip sa “Lupin” nga gikatahong todo actions na ang buhaton ni Richard Gutierrez sa nahibiling duha ka semana.