Valerie extended sa Wowowee

Subling mulugwa si Valerie Concepcion isip guest co-host karong adlawa sa noontime show Wowowee ni Willie Revillame, sa ABS-CBN.

Sa nasayran, usa ra unta ka adlaw, meaning kagahapon ra, ang orihinal nga plano nga palugwaon si Valerie sa nahisgutang show, aron suwayan unsay reaksyon sa televiewers sa iyang presensya sa maong show.

Apan nasayran sa Banat Hugyaw gikan sa usa ka kasaligan nga tinubdan nga pabalikon si Valerie karong udto tungod kay nakauyon ang production team sa gipakita ni Valerie kagahapon, sanglit gawas nga duna na siya’y ikabuga sa sayaw, nabantayan usab ang iyang potensyal sa hosting nga molambo pa kun ugmaron.

Samtang ang text message sa inahan ni Val nga si Mommy Mayen ngadto sa Banat Hugyaw kagabii nagkanayon nga nagmeeting na sila si Direk Bobot Mortiz ug ang manager sa young star nga si Becky Aguila.

Check! Miabot na si Becky gikan sa London niadtong Martes sa gabii, apan inay nga tubagon niya ang mga intriga nga gibato ngadto niya may kalabutan sa kontrobersya ni Angel Locsin sa GMA-7, gipili niya nga magpakahilom una aron atimanon ang sitwasyon sa uban pa niyang mga talents sama ni Jennylyn Mercado ug Val.

Kagahapon nahamayag na si Ms. Wilma Galvante, GMA Senior Vice President for Entertainment nga walay angay kabalak-an si Jennylyn tungod kay dili nila kini pasagdan, ug kun unsay namantala sa kontrata maoy masunod.

Co-management ang kontrata ni Jennylyn sa GMA Artist Center ug ni Becky Aguila.   “Jennylyn is a StarStruck discovery. May obligasyon ang network sa kanya at ini-honor ng GMA-7 ang contract,” nagkanayon si Galvante.

“Iyong initial obligation sa kanya, sa first year, she earned more than what was stipulated sa contract. We honor our contract.”

Pagkakaron usa ka soap, Pasan Ko Ang Daigdig, ug tulo ka guestings—Maynila, Toktok Isang Milyon Pasok ug Takeshi’s Castle—ang nahanaw sa mga kamot ni Jennylyn. Walay rason nga gipadayag apan gituohan nga damay si Jen sa issue ni Angel.

Samtang si Valerie wala nay kontrata sa ArtistCenter tungod kay wala na siya ma-renew  human kini matapos niadtong July 14. Ang kontrata niya kang Becky July 2008 pa kutob busa kinahanglan niyang musunod sa mando niini aron siya palugwaon sa Wowowee kagahapon.

Tsika pa ni Mommy Mayen sa Banat Hugyaw dugay na nga gidapit si Valerie aron mo-guest sa maong noontime show apan wala matigayon tungod sa kontrata nila sa Artist Center.

Gitin-aw niya nga nananghid sila og tarong sa Artist Center labot sa guest co-hosting assignment ni Valerie sa Wowowee.

“ Bukas pinababalik ulit kami, nadum Val sa Wowowee,” pagtino ni Mommy Mayen.

Hangtud sapagsuwat niining maong balita pasado alas siyete kagabii, nagpadayon pa ang meeting nila ni Becky ug Direk Bobot, busa wala pa matino hangtud kanus-a magpabilin si Val sa maong show isip guest co-host.