Sugwak ang tawo sa “Thank You Lord” concert

Makapahinuklog kaayong sud-ongon ang mga tawong mahinangpong mihugop sa “Thank You Lord” concert ni Don Moen niadtong nakalabay’ng Biyernes sa gabii. Bisan pa man sa kagubot nga atong nasinati ibabaw ning kalibotana ug mga kabalaka nga nagbutok-butok kanunay sa atong mga kasingkasing, daghan pa gyod diay kitang gustong magpuyong malinawon sa kalibotan.

Tinood gigamhan na ang kalibotan sa bulok sa materyalismo, apan aduna pa’y mga tawo nga labaw nilang gihigugma ang Diyos, ug kini akong nasaksihan diha sa ilang pagbakyaw sa ilang mga kamot paghatag pagdayeg sa Ginoo atol sa “Thank You Lord” concert. Gipahigayon ang maong konsiyerto sa Pacific Grand Ballroom sa Waterfront Cebu City Hotel – Salinas Drive, Lahug hatod sa MaxiMedia, sa praise band/ministry ni Don Moen ug sa Integrity Music nga maoy “label” sa iyang mga albums nga “God Will Make A Way”, “Rivers of Joy”, “Thank You Lord” ug “Hiding Place”.

Nagyaka na lang ko sa carpet duol sa entablado, bantang kaayo sa nahimutangan ni Don Moen kay ang akong lingkoranan naa na’y nag-okupar. Na-delatar ko’g bale’g 30 minutos tungod sa akong obligasyon sa akong trabaho isip copy editor sa The FREEMAN maong wa ko dayon kabiya-i ang akong work station bisan pa man og naglungot-lungot na kong mobiyahe padulong sa nahimutangan ni Don Moen. Paghangyo nako sa ubang mga tumatan-aw nga mahimo ba’g ako na lang ang mo-okupar sa mga bakanteng monoblock chairs sa ilang tapad, may mga nangatarongan nga kuno “taken” na ang maong mga lingkoranan. Nakatuaw ko “kapaetttttttt”. Dili gihapon mawala ang mga hakog bisan pa man og nagwara-wara sila sa pagdayeg sa Diyos. Sige na lang, tagaan og chance! Kay kun atong aninawon ang sitwasyon daw nahibalik sa panahon ni Kristo nga may duha ka klase sa magtotoo – Pariseyo ug Publikano. Ang Pariseyo mao ang ipokrito samtang ang Publikano tago kun mag-ampo nga may sagol pagpamukbok sa dughan.

Malipayon na kaayo ko nga sa dihang nangutana si Don Moen kon unsang kantaha ang gusto sa mga tawo nga sunod niyang kantahon, wa gyod ko niya hikawi sa dihang misinggit ko’g “Hiding Place”. Kinaham ko usab ang “Come To the River of Life” ug “Your Steadfast Love”. Walay sukod ang kabuotan sa Ginoo kay bisan pa man sa akong dakong pagka-makasasala, mahigugmaon ko niyang gipasulod sa iyang kasingkasing nga maoy akong nahimong “hiding place”. Kay sa matag hampak sa mga pagsulay, kaniya ra man ako makapamarayeg. Nidako ko sa usa ka pamilya nga naglisod paghatag og tukma kun tinong depinisyon kon unsa gyod ang gugma. Wala ni nako makita mismo sa akong mga ginikanan. Ambot gani kon ako produkto ba kaha sa ilang pagminahalay o may gugma ba kaha sa dihang ila kong giumol o nahimo ba kaha nga bunga sa ilang panaghinigugmaay. Sa Diyos ra nako nakita kon unsa gyod ang bulok sa Gugma. Ang Diyos mihatag og ulan ngadto sa balaan ug makasasala. En tonces, mihatag nga wala’y pagpinig ni wala’y kondisyon. Maong niadtong gabhiona, paanod sa bagang duot sa katawhang nakaila sa kabalaan sa Diyos, gibalik nako niya ang tanang pasalamat nga sa akong kasingkasing aduna’y musika nga Siya gayod ang nahimong sentro. Musika nga makapausab og kinabuhi. Bulahan kadtong, bisan sa lawod sa kalisdanan, mihatag gihapon og mga pagdayeg sa Amahan nga nagmatuto kanato bisan pa man sa atong katampalasan.

Hinaut pa nga daghan usab ang mosunod sa lakang ni Don Moen dinhi sa ato. Sa atong mga suliran nga naglaundok, usahay habog pa’s mga bukid, angayan nga makapaminaw kita’g mga kanta nga naghubit sa matuod nga kahulogan sa Gugma. Dili kanang taphaw nga gugma. May mga mihulagway niini nga “inatay o giatay”. Apan dili man ang gugma tingali ang na-inatay. Dili man kini susama’g manok nga atayon. Nagkinahanglan usab kita’g mga kanta nga makahatag og kalinaw sa atong kasingkasing ug pahulay sa atong nagkondenar nga kalag, dili kay puros suliran ang gibatbat. Molabay ra kita niining kalibotana ug mabiyaan ra nato tanan natong gipangpas-an, walay hinungdan nga kantahan kita’g mga huni nga ang tenor nag-awhag og pagkutlo sa hinulamang kinabuhi sama sa paglayat sa taytayan.

Problemado na gani ang tawo, hulhogan pa gyod nga magpakamatay. Mao na’y lisod sa ubang mga kanta, kay imbis giisip ang musika nga usa ka paagi nga mogaan ang imong pamati, maburyong na hinoon ka. Mga kanta nga inay tahoron ang indibidwalismo, nagyaga-yaga na’s dignidad sa tawo. Labi na’s mga mahuyang. Buot nakong ipasupot nga daghan na kaayong tawong daw sa mawad-an na’g paglaom nga manlimbasog o padayong makigbugno ning “walog nga luhaan”, busa nagkinahanglan sila’g tarong nga giya.

Ginaingon sa Balaang Kasulatan nga ang buta dili makaguyod sa lain pang buta kay silang duha mangahulog gyod sa kanal. Kun ato kining i-apply sa matang sa musika nga atong tagikon, dili kita makahatag og maayong pagtulun-an sa tigpaminaw kun mismo ang atong kinabuhi labaw pang wala’y direksyon. Ang pagpaminaw ug paghangop sa mga contemporary Gospel songs usa sa mga paagi nga makahatag kita’g transisyon sa direksyon sa atong musika. Hinaut pa nga mas daghang tawo ang moila nga balaan ang gugma, dili hakog, dili mapalabi-labihon ni mapahimuslanon. Ang gugma gasa sa Diyos nga mismo maoy Gugma. Busa wala’y igong katarongan nga makaingon kita’ng ang iyang gasang gugma giatay. Ang tawo siguro nga nagpakaaron-ingnon nga siya nahigugma apan wala makasabot sa diwa niini maoy “inatay.”