Jun-Jay Abasanta Sa Makadawa

Human mapalanog ang mga linagubo ug kinasa-kasa sa ilang mga kahimanan sa pagpanukar, mipakita ang managsoong Leonardo “Jun” Abasanta, Jr. ug Jay Abasanta (bandang Makadawa) sa ilang makapabilib ug makapasina kaayong “bonding.”

Nagkasinabot gyod and duruha nga sudlon ang kalibotan sa pagbanda-banda nga nahimong tulay sa ilang paghatag og mas halawom nga kahulogan sa ilang pagka-managsoon ug panaghinigalaay.

Si Jun mao ang drummer sa bandang Makadawa, samtang si Jay mao ang lead guitarist. Ikahulagway sila nga mga “wa’y libog, mga bugoyon bisan pa man sa ilang matawag nga harohay nga estado sa kinabuhi, ug kun sa Iningles pa matawag nga parehong “cool” ang managsoon.

 Natawo si Jun niadtong Oktubre 9, 1978 sa magtiayong Leonardo, Sr. ug Celsa Abasanta nga mga residente sa Atisan, Cansojong, dakbayan sa Talisay.

Samtang si Jay natawo niadtong Nobiyembre 21, 1979. Mga sipat kuno sila, matud pa nila, apan dili masupilon sa ilang mga ginikanan. Saysay pa nila nga gipuno sila sa pagmahal sa mga tawo nga naglibot nila mao nga nagdako silang manggitahoron ug masinugtanon sa ilang mga ginikanan. Makita ang maong disiplina sa ila karong pagbulig sa matang sa panginabuhi sa ilang pamilya. Labi na gyud si Jun nga maoy maguwang, busa maoy nibarog isip tuong kamot sa iyang amahan sa pagpadagan sa Jun-Jay Handicrafts. Si Jay usab ang artist nga maoy maghuna-huna sa mga desinyo alang sa ilang export products nga mga “seed leis” kon mga lisong igsasab-ong o kwentas. Ginama ang maong mga seed leis sa lumbang kun kukui nuts ug dapdap nga halinon kaayo labi na sa Hawaii .

 Gisaysay sab sa magsoong chinito nga nagpasalamat sila nga wala maglagyo ang ilang mga edad kay mora lang sila’g managbarkada, labi na kay sila rang duha ang nahimong bunga sa pagminahalay sa magtiayong Leonardo ug Celsa. Sila rang duha ang magpunay og dagan-dagan, gukod-gukod, duwa-duwa, ug magkaraw-karaw sa ilang mga duwaan sa ilang lawak kaniadtong gagmay pa sila.

 Sa nagtungha pa sila sa elementarya, nakapakita na sila’g mga timailhan nga aduna gyod sila’y katakos sa pagpanukar. Kaniadtong bag-ong habwa pa sa kulon ang Original Pilipino Music, mga kantang sayon ra’ng sag-ulohon sa mga gagmay’ng bata, misuway sila pag-apil og amateur singing contest nga gipahigayon sa ilang lugar diin nangunay og kanta si Jay sa inila kaayong “Mga Kababayan Ko” nga gipasikat sa Pinoy master rapper nga si Francis Magalona. Usa sa nakapalingaw kaayo sa mga nanan-aw niadtong gabhiona mao ang pagsaka ni Jun sa entablado aron magsilbing back-up dancer isip suporta ngadto sa iyang manghod.

Hilabihan kunong nakawara-wara ni Jun ug ikid-ikid. Wala damha, nakanlat gyod ni Jay ang unang pwesto.

Sunod nila nga lakang mao ang pagtuon sa mga nagkadaiyang tolonggon nga ilang gikahiligan. Misantop ang maong ideya sa dihang nagtungha pa sila sa high school. Inubanan sa kugi ug sa maayong istilo sa tinudloan sa usa ka Dennis Labajo, nagpunay na og papiti si Jun sa drums. Ug gihigugma sab pag-ayo ni Jay ang pagkaskas sa iyang gitara. Human niini, nagkasinabot sila nga magtukod og banda. Ila kining gihisgotan atol sa usa ka paniudto sa kantina sa ilang tulunghaan. Graduating na niadto sa high school si Jun samtang naa sab si Jay sa iyang ikatulong ang-ang sa high school.

Ang konsepto sa banda-banda mao kuno’y nagpalawom pa pag-ayo sa ilang “bonding” isip managsoon.

“Eversince pagkabata namo, mura’g kaduha ra mi nag-away,” pu’ng pa ni Jun. “Wa gyud mi nagkaaway og dako. Ang hinungdan, mga char-char ra gud,” nga giuyonan sab pinaagi og ngisi ni Jay.

“Karon napamatud-an namo nga hasta sa musika, gihimugso mi’ng usa lang sab ang hilig ug direksyon,” ni Jun pa.

Tungod sa ilang kalipay sa pagpanukar, nagamit nila kini nga hinagiban sa pagtungha nila sa kolehiyo kay sila gyong duha ang natagaan og 100 percent free scholarship sa Asian College of Technology, Bulacao ug Colon branches. Gigamit nila ang ilang talento sa panahon nga mangampanya ang ilang eskwelahan ngadto sa mga nagkalain-laing dapit labi na sa mga tulonghaan. Motabang sila og awhag sa mga manggradweyt nga mga tinun-an sa high school nga kun makadesisyon nga mopadayon sa kolehiyo, pili-on ang pagpa-enroll sa ACT-Bulacao ug Colon branches.

Sa pagpanglipang sa Bisaya rock dinhi sa Sugbu, mipakita na sila’s ilang katakos kuyog ang lain pang mga sakop sa bandang Makadawa. Sila nagkanayon nga mas malipayon gani sila karon tungod kay sangko sa langit ang paghangop sa mga kabatan-onan sa genre sa Bisaya rock. Lahi na kaayo sa kaniadto nga baduyan sa mga kantang Bisdak.

 Gani, buot kuno silang mo-“tumbling” tinukmod sa tumang pagmaya sa dihang nadunggan na nila ang pagpalanog sa pipila ka mga komposisyon sa Makadawa nga gisumite nila sa 93.1 Smash FM, sama sa “Sigarilyo, Mangga, Abat,” ug daghan pa.

Ug bisan pa man kuno og natuman na nila ang ilang damgo nga makapabuhagay sila sa ilang kainit may kalabotan ang musika, lahi ra gyod kuno kun mahiapil ka sa phenomenal nga paglupad sa Bisrock.

 Sa ilang bakanteng oras, mangutlo sila gikan sa ilang kasinatian ug sa ilang palibot og mga ideya nga mamahimong materyal alang sa mga sunod pang mabulokong mga kanta. Ang “Gibuwagan” gitagik ni Jun nga matud pa niya, “tinuod nga kasinatian niya sa gugma” ug ang “Milagrosa” ni Jay nga undanon kaayo ang mensahe tungod kay kini naghisgot man sa “daghang mga kababayen-an karon nga mahiligon sa pagbuhat og mga milagro.”

Dili na sab maihap ang mga venues nga diin sila nakapasundayag, labi na gyod ngadto sa nagkalain-laing dapit sulod ug gawas sa dakbayan. Ilang giisip nga ang kasaulogan sa anibersaryo sa dyLA sa miaging tuig mao ang gig nga dili nila makalimtan kay wala sila magdahom nga ingon niadto ka-jamming ang Bisrock pack.

Ang ilang album nga giulohan og “Obra de Kanta” adunay 13 cuts, mga orihinal nga komposisyon nga mapalit sa tag-P150 kun sa Manu sa E-Mall paliton. Apan kun orderon direkta, pinaagi ni Jun, mapalit kini sa tag-P120. Tawag o text sa 09062770316.

Sa pangutana kun hataas pa bang panahon ang ilang ihatag ngadto sa ilang unang gugma nga mao ang pagpanukar, si Jun nagkanayon, “hope mo-last gyod mi kay bisan man gud og mamatay na ka, apan kun duna ka’y nindot nga gikompos nga magpabilin it’s worth the struggle.”

“Para nako molaum ko nga we will still have this space wherein we learned nga there’s no room for error kun ikaw usa ka musikero. Ang hagit is to create music nga naggikan gyod sa kasingkasing,” panapos ni Jay.