Ang giila nga komedyante, usa sa Dos Agodos nga si Pakol, Diosdado Maga, Jr., sa tinuod nga kinabuhi, maguwang sa iyang kauban sa Dos Agodos nga si Estelito “Ramil” alyas Gardo Maga, apan matud pa sa iyang manghod mas badlongon gyod kono ang iyang maguwang kay kaniya. Apan may mga kasinatian usab si Pakol nga angayan pod kono siyang sabton.
Dili pa lang dugay, nawagtang ang iyang pitaka sa usa ka taksi. Nahitabo kini niadtong Huwebes sa gabii, Hunyo 5, or Biyernes sa kaadlawon, Hunyo 6 na. Gikan sila si Ramil o ang Dos Agodos sa usa ka show, ug samtang si Ramil kon Gardo misakay sa laing taksi paingon sa iyang pinuy-anan sa Bakilid, Mandaue City, nagpanglingi pa kuno si Pakol sa usa ka KTV Bar, kay gusto pang mohapit pamasin kun diha pa ang iyang kompare nga gikasabot niyang makigkita alang sa lain na usab nga show. Pagsulod niya sa KTV Bar nga naa mahimutang sa dalan Sanciangko, giingnan kono siya sa kahera nga nalakaw na ang iyang kumpare ug wa na makapaabot niya, busa migawas siya ug misakay og usa ka taksi nga wa sad niya makuha ang plate number ug ngan, tungod lagi pod sa kakapoy gikan sa show, labi na kay naka inom inom pod siya. Pagkanaog niya sa ila diha sa Hipodromo, gibayran pa niya ang driver sa taksi, apan sa pag-abot niya sa ila, namatikdan nalang niya nga wa na ang iyang pitaka nga may sulod nga kwatro mil nga cash, mga ATM cards, ug uban pang mga mahinungdanong mga papeles. Dili raba siya makapaneguro kun sa taksi ba mahulog ang iyang pitaka, o sa dalan ba diha sa Hipodromo duol sa balay nga iyang gipuy-an. Gipasibya na kini niya niadtong Biyernes sa buntag sa tulomanon nilang Ricky Rama Poca ug Divine Marcial Flores “Hello, Cebu, Maayong Buntag, Pinoy” apan wa pay feedback busa nanghinaot si Pakol nga pinaagi sa Banat News, maluoy ang nakapunit sa maong pitaka, bisa’g wa na ang cash, iuli ngadto sa bisan asa nga estasyon sa radyo, labi na sa programa nilang Ricky Rama Poca diha sa broadcast center sa CCTN, channel 47. Miingon si Pakol nga kaniadto, nakapunit ang iyang amahan nga usa ka taksi driver og pitaka sa iyang taksi nga gimaneho, gipaninguha niya pagpangita ang tag-iya niini aron kini mauli, apan sa pag-uli niya, gidudahan pa siya nga siya’y nagkuot sa maong pitaka, pero dili kini niya buhaton ngadto sa makapunit sa maong pitaka, kay matud niya, tungod sa iyang kasinatian, dili siya magduda nga ang nakapunit sa iyang pitaka, maoy nagkuot niini gikan sa iyang bulsa.
