Ang bag-ong Jimmycycle

Bisan nangaputol ang mga kwerdas sa gitara sa bag-ong bahista sa Jimmycycle, padayon gihapon ang “acoustic jammin’ session” sa maong pundok niadtong Mayo 23, Miyerkules, sa tulumanong “BisrocKabataan” nga gipalanog sa 93.1 Smash FM.

Nahasiril-siril og pangita’g baligyang kwerdas si Jimmelou “Jimmy” Daclison, ang vocalist ug ingon man tigkaskas sa gitara sa maong pundok human nasukamod ang bag-ong bahista niini nga si Miller Gabuya sa hagdanan sa estasyon. Isip reflex, natukod niya ang iyang gitara ug tungod sa pagpamugong nga dili mabunal sa hagdanan, nalarot ang mga kwerdas niini.

Apan tungod kay may ginaingon man nga “the show must go on,” mituratoy si Jimmy pagdagan padulong sa Basilica del Sto. Niño sa pamasin nga may kapalitan og kwerdas. Maayo na lang gani kay diha’y tindero og sista. Ug iya gilayong gihangyo ang tindero nga “emergency” gyud ang iyang pagpanginahanglan sa kwerdas. Hinungdan nga nisugot ang tindero nga inay ang tibuok sista ang paliton, ang kwerdas lang ang tuyo ni Jimmy.

Tuod man nahibalik sa estasyon si Jimmy nga gipaningot og bugbog. Padayon ang tulumanon sa pagpalanog sa mga bag-ong kanta sa “bag-ong Jimmycycle”.

Kahinumduman nga ang Jimmycycle usa sa mga unang nibarog alang sa pagpalanog sa mga Bisdak nga mga komposisyon. Gani, nahapitan pa kining maong hilisgotan sa kataposang bahin sa pakighinabi. Daghan og giduol nga estasyon si Jimmy aron unta isumite ang ilang demo CD, apan pakyas siyang matagad ang maong katuyoan. Samtang sa Smash, diha na si DJ Ram Dizon nga niadtong panahona naghulat usab nga duna’y mga bandang Bisdak ang mga kanta nga mosumite sa ilang musikanhong mugna tungod kay kulang pa ang iyang materyales. Imbis nahan-ay na ang takna ug unsa ang format alang sa usa ka tulumanon, kuwang ang materyales alang sa playlist, matud pa ni DJ Ram. Sa dihang mibutho si Jimmy sa estasyon, siya usab ang nakahatag og ideya ni Ram nga mas labing maayo manuki-duki ang naulahi kon asa ang tapokanan ning maong mga banda. “Si Jimmy gyud ang nakahatag nako’g idea nga motambay sa Handuraw sa Mabolo ug sa Casbah sa Ayala,” pamahayag ni Ram.

Balik sa bandang Jimmycycle, napatik na ang ilang mga tingusbawan dinhi ning maong pamantalaan niadtong Mayo sa nakalabay’ng tuig apan kadtong   mga kauban ni Jimmy sila pa’ng Expedito “Choyex Doyek” Siaboc (wala matino kon ig-unsa ni Eduardo “Jay-R” Siaboc) isip bahista ug si Arniel “Potenciano” Ong isip drummer. Tungod sa lain pang mga prayoridad sama sa trabaho, dili na aktibo silang Siaboc ug Ong. Hinungdan man gani nga gihulipan sila nilang Ringgo Jay “Gogoy” Diñero, tigkaskas sama ni Jimmy; ni Miller Gabuya sa baho, ug ni Engelbert “Jimbot” Campomanes sa drums.

Dili na bag-o sa tulo ang pagpanukar. Gani nalipay kaayo si Gogoy nga nahilakip sa Jimmycycle. “Nindot kay ang tirada ni Jimmy mao sab ang akong tirada,” niya pa atol sa interview portion sa maong tulumanon. Nasayran sab nga si Gogoy taga Cagayan de Oro City ug nga death metal-screamo ang iyang orientation, apan tungod sa kakuwang kuno sa suporta sa mga estasyon sa CDO, wala gyud makapanglipang ang susama kanilang indie artists sa Cagayan.

Samtang si Miller ug Jimbot mga sakop sa lain pang Bisrock nga banda, ang Timeslot. Ilang giklaro nga wala ma-“disband” ang Timeslot. Nahitabo lang kuno nga ang vocalist niining babaye nagsabak ug ni-“lie low,” mao nga dili na aktibo ang Timeslot. Sa ilang pagtabok sa Jimmycycle, ila nang nasugdan ang paghatag og kinabuhi sa mga bag-ong kanta.

Una nilang gihatagan og acoustic nga rendisyon ang “Adios,” Gihulagway kini ni Jimmy nga “medyo dark.” Kini nakabasi sa kasinatian ni Jimmy nga pu’ng pa niya daghang tawo ang maka-relate tungod kay kasagaran kanato makasinati gyud og depresyon. “There are moments in our life nga mo-stop la’g kalit pag-revolve ang kalibotan. Mora’g wa ta’y nahimo, wa ta’y na-achieve, mora’g wa tay padulngan. And that there’s no other way out,” niya pa.

Sa wala pa niya ihukad ang pinakakinaham sa tanan nga “Bakasi” nga maoy labing unang track sa ilang karaang EP album nga nakalangkat og makabungog nga pagtagad, iya usa’ng gipalanog ang “Open Words”. Natagik kini sa pinulongang Ininglis, ug buot klarohon ni Jimmy nga “even Bisrock artists makamao sad mosuwat og English songs.”

Tugob sa pagtulon-an ang lain pang kanta nila nga nag-ulohan og “Wa Na’y Gugma”. Gawas nga dali ra kaayo masakyan ang melodiya niini, tataw ang kinasingkasing nga pagpahaom sa chords nga gibuligan pag-arrange nilang Gogoy ug Miller. “Kon imo ning paminawon kantaha mora siya’g love song, pero kon imo gyud nga sabton pag-ayo imong mabantayan nga anti-love song diay siya. Mao na karon ang transisyon sa among musika,” pamahayag ni Jimmy.

Gikan sa mga kantang sekswalidad sa tawo ang dugokan, nag-mature na usab ang direksyon sa Jimmycycle. Masabtan kini sa “undertones” diha’s pagkalatid sa ilang anti-love song nga nagkanayon, “wa na’y gugma…puro na lang kayugot, puro kasamok.” Gipalanog sa pundok ang kaguliyang sa kalibotan gumikan ra usab sa tawo nga kuli nang magtinil og gugma sa iyang kasingkasing. Puro na lang kasilag ug pagdumot ang nipatigbabaw. Hinungdan man gani nga usa na lang ka “Utopian dream” ang makatagamtam og kalinaw.

Nilagbas ang maong tema sa unsa mang tradisyonal nga pagsabot sa gugma. Mas gigahinan sa Jimmycycle og pag-analisar ang mas halapad pa’ng matang sa gugma.

Ang Jimmycycle nagplano nga magpagawas og usa ka EP album pipila ka buwan gikan karon. Pagalangkoban ang maong album sa unom nila ka mga bag-ong komposisyon. “Naglisod gyud mi tungod sa skedyul nako sa trabaho ug unsaon sab ani pag-funding sa among project, pero paningkamotan namo nga mag-EP,” pasalig ni Jimmy kansa ni-file pa gyud og leave of absence niadtong adlawa sa ilang pamuhatan aron lang makatunga sa “BisrocKabataan”.

Gawas sa Bakasi, ang Jimmycycle mao usab ang tingog likod sa Lansiao, Tomboy, Peling Gwapa, Pilok sa Kanding, Kodigo, ug Unsa Ning Tama-a. Sipa sab ang nadawat nga airplay requests sa Unsa Ning Tama-a sa sayong bahin sa pagpanglipang sa Bisaya rock music. Gani, sa unang hugna sa akong pagpanuki-duki may kalabotan ang Bisrock, ang Unsa Ning Tama-a maoy nagsilbing bato-balani nga nakahigop nako pagpangita’g paagi nga makahinabi ang Jimmycycle tungod kay ang maong komposisyon usa man ka sarkastikong paagi sa paghulagway sa mga nahitumpawak sa paggamit og ilegal nga drogas.