22 na pero, di pa "binyagan" si Victor Basa!

Masasabing hindi kaguwapuhan si Victor Basa, isa sa ka-love triangle nina Joem Bascon at Eda Nolan sa soap dramang Walang Kapalit nina Piolo Pascual at Claudine Barretto na airing na sa Lunes, April 23.

Pero maraming naiintriga sa baguhang aktor dahil bukod sa tahimik ito ay patingin-tingin lang at napakatipid kung ngumiti.

Say nga ng ilang katoto, "Ruggedly handsome" ang packaging ni Victor ng Star Magic.

Anyway, nung ipakilala ni Star Magic PR head (Rikka Dylim) si Victor last year ay natanong ito kung virgin pa siya at walang kagatul-gatol niyang sinabing "Opo".

Kaya’t inokray na namin siya na hindi na kami naniniwala dahil sa edad niyang 22 ay hindi pa rin siya nabibinyagan?

Isang taon na ang nakalipas, iisa pa rin ang sinabi ni Victor, "Consistent po ako, virgin pa rin ako," muli niyang sabi.

* * *

Inamin ni RJ Jimenez na may komunikasyon sila ngayon ni Yeng Constantino habang nasa US ito.

"Natatawa nga po ako sa kuwento niya kasi panay daw ang Ingles niya, nabubulol na nga, pati ako, ini-Ingles sa text."

Napag-usapan pala nina RJ at Yeng na trabaho muna ang aasikasuhin nila at kapag established na sila ay saka nila itutuloy ang kanilang naudlot na relasyon.

At habang nasa US si Yeng, kaliwa’t kanan ang gigs ni RJ. May launching ang debut album niya under Dream Music sa 2nd week of May at may concert siya sa May 31 sa Teatrino Greenhills na produced ng kanyang manager.

* * *

Galing na mismo sa bibig ni senatoriable Manny Villar na hindi lupa’t bahay ang ibinayad niya sa mga artistang nagi-endorse sa kandidatura niya.

Kilala ang senador na nagmeme-ari ng mga malalaking subdivision sa buong Metro Manila at iba pang karatig bayan.

Klinaro naman ng anak ng Senador na si Mark na hindi siya nanliligaw sa isa ring endorser ng kanyang ama na si Jennylyn Mercado dahil alam niyang may boyfriend na ito, si Patrick Garcia. – REGGEE BONOAN